Íslandsbanki spáir 4,7 prósenta hagvexti á þessu ári og býst við að fjöldi ferðamanna muni aukast. Þetta er meðal þess sem fram kemur í nýrri þjóðhagsspá Íslandsbanka sem kom út í morgun.

Jón Bjarki Bentsson, aðalhagfræðingur Íslandsbanka, segir að fram undan sé gott vaxtarár. „Við erum að spá aðeins meiri hagvexti heldur en í fyrra. Stóra breytingin er sú að í fyrra þá var vöxturinn að stærstum hluta drifinn áfram af innlendri eftirspurn. Við sáum myndarlegan vöxt í einkaneyslu og sérlega myndarlegan í fjárfestingu. Á meðan þá var útflutningsvöxturinn aðeins minni en við væntum,“ segir Jón Bjarki og bætir við að von sé á myndarlegum útflutningsvexti í ár.

Jón Bjarki Bentsson, aðalhagfræðingur Íslandsbanka.

„Sá vöxtur er að stórum hluta að þakka auknum fjölda ferðamanna og góðri loðnuvertíð. Einnig sjáum við talsverðan vöxt í eldisfiski og hugbúnaðarútflutningi og í fleiri greinum. Við munum einnig halda áfram að sjá kröftugan vöxt í einkaneyslu.“

Jón Bjarki segir jafnframt að hann búist við mun fleiri ferðamönnum í ár heldur en í fyrra.

„Það sem er jákvætt er að ferðavilji fólks milli landa er ekki jafn næmur fyrir sveiflum í faraldrinum eins og verið hefur."

„Við gerum ráð fyrir að ferðamenn á árinu verði um 1,1-1,2 milljónir í ár. Við gerum ráð fyrir aðeins færri ferðamönnum í ár heldur en við gerðum ráð fyrir í haustspánni. Ástæðan fyrir því er fyrst og fremst það bakslag sem varð í faraldrinum og aðgerðum og hvaða áhrif þær hafa á sóttvarnir og ferðavilja næsta kastið,“ segir Jón Bjarki og bætir við að fyrsti þriðjungur ársins verði heldur rýr í roðinu varðandi komu ferðamanna.

„Við sjáum fyrir okkur að Bretar munu að öllum líkindum ekki koma í sama mæli og þeir hafa oft stundað vetrarferðamennsku hér á landi. Það sem er jákvætt er að ferðavilji fólks milli landa er ekki jafn næmur fyrir sveiflum í faraldrinum eins og verið hefur. Síðan er þorri þeirra ferðamanna sem er að sækja Ísland heim bólusettur. Þannig við sjáum á könnunum og heyrum á bókunarstöðu ferðaþjónustunnar að það er ástæða til bjartsýni og að fólk horfir til Íslands í ríkum mæli. Við höfum notið góðs af því að hér sé rúmt um fólk og hægt sé að ferðast án þess að vera í of miklu návígi við aðra ferðamenn.“