Alþjóðlega matsfyrirtækið S&P Global Ratings hefur staðfest A/A-1 lánshæfiseinkunnir ríkissjóðs Íslands með stöðugum horfum. Frá þessu er greint í tilkynningu frá fjármála- og efnahagsráðuneytinu.

Þar segir að S&P reikni með lítilsháttar samdrætti á yfirstandandi ári vegna samdráttar í komum ferðamanna til landsins, en að hagvöxtur muni við sér á ný frá og með 2020. Viðnámsþróttur hagkerfisins bæði á sviði ríkisfjármála sem og í ytri stöðu þjóðarbúsins er sagður traustur.

Í tilkynningu segir að lánshæfiseinkunn ríkissjóðs endurspegli háa landsframleiðslu á mann, stöðuga stofnanaumgjörð og skilvirka stefnumótun. Einkunnin tekur einnig mið af sterkri stöðu ríkisfjármála eftir verulega niðurgreiðslu skulda á undanförnum árum og takmörkuðum sveigjanleika peningastefnunnar, sem þó er tekið fram að hafi aukist eftir losun fjármagnshafta.

Stöðugar horfur endurspegla þannig skoðun matsfyrirtækisins að svigrúm í ríkisfjármálum og erlendri stöðu þjóðarbúsins vegi á móti áhættu vegna sveiflna í þjóðarbúskapnum og hugsanlega meiri samdrætti í ferðaþjónustu en búist er við.

Þá segir að lánshæfiseinkuninn gæti hækkað ef staða ríkisfjármála og ytri staða þjóðarbúsins styrkist markvert umfram væntingar matsfyrirtækisins. En þó gæti hún einnig lækkað ef merki koma fram um aukinn greiðslujafnaðarþrýsting eða að fjármálastöðugleika sé ógnað á næstu tveimur árum. Segir að dæmi um slíkt gæti verið ef að samdráttur í ferðaþjónustu hafi víðtækari efnahagsáhrif en reiknað er með.

Tilkynning ráðuneytis er aðgengileg hér.