Sólveig Stefánsdóttir, nýr framkvæmdastjóri Saga Natura.

Sólveig tók við stöðu fjármálastjóra Saga Natura í ágúst 2021, en starfaði um árabil sem fjármálastjóri Félags íslenskra hjúkrunarfræðinga. Einnig starfaði Sólveig í eignastýringu fagfjárfesta og við verðbréfamiðlun. Sólveig lauk MBA prófi við Háskólann í Reykjavík árið 2020 og B.Sc. gráðu í viðskiptafræði frá sama skóla árið 2003. Auk þess hefur Sólveig lokið prófi í verðbréfaviðskiptum.

Saga Natura er markaðsdrifið rannsóknar- og þróunarfyrirtæki sem hefur undanfarin ár þróað og markaðssett fjölmörg bætiefni úr náttúrulegum hráefnum, svo sem úr íslenskri ætihvönn og astaxanthin, sem unnið er úr þörungum sem ræktaðir hafa verið af fyrirtækinu.

Að sögn Sólveigar eru mörg tækifæri framundan hjá Saga Natura, „Við sjáum fram á mikil tækifæri, þar sem áhuginn á okkar einstöku vörum eykst mikið samhliða aukinni vitund almennings um mikilvægi þess að stuðla að góðri heilsu, á sem náttúrulegastan hátt.

Vörur eins og SagaPro eru enn í örum vexti og hafa sannað gildi sitt eftir 17 ár á markaðnum. Fólk er mun meðvitaðra í dag að náttúrulegar lausnir séu til við hvimleiðum einkennum ofvirkrar þvagblöðru. Einnig hefur fyrirtækið átt góðu gengi að fagna með ýmsar aðrar vörur, s.s. AstaSkin og AstaEye, en augnlæknar hafa sérstaklega mælt með þeirri síðarnefndu.“

Lilja Kjalarsdóttir fráfarandi framkvæmdastóri segir að Saga Natura hafi verið í örum vexti að undanförnu og náð miklum árangri í sölu jafnt innanlands sem erlendis. „Saga Natura er á spennandi tímamótum og mörg krefjandi og áhugaverð verkefni fram undan. Ég hlakka til að fylgjast áfram með árangri fyrirtækisins og tel að Sólveig sé mikill fengur fyrir félagið,“ segir Lilja.