Það má segja að stjórnarkjörið sem er fram undan í Icelandair, en þar er formaðurinn Úlfar Steindórsson á meðal frambjóðenda, marki ákveðin tímamót. Um árabil hefur eignarhald á skráðum félögum í Kauphöllinni verið þannig að lífeyrissjóðir fara samanlagt með stóran hlut á móti öðrum fagfjárfestum og einkafjárfestum. Lítið hefur farið fyrir almennum fjárfestum. Þessi samsetning hluthafa getur síðan endurspeglast í stjórnarkjöri viðkomandi félags þar sem fjársterkir einkafjárfestar stilla sér upp á móti lífeyrissjóðum. Lífeyrissjóðir áttu samanlagt um 53 prósenta hlut í Icelandair fyrir hlutafjárútboðið en hann hefur lækkað niður í liðlega 25 prósent á sama tíma og hluthöfum hefur fjölgað úr 3 þúsundum í 14 þúsund. Icelandair Group er orðið sannkallað almenningshlutafélag. Vonir standa til þess að almennir fjárfestar láti sig stjórnarkjörið varða, rýni í rökstuðning tilnefningarnefndar og leggi mat á skynsamlega samsetningu stjórnar með tilliti til hæfni og reynslu. Það er ágætis tilbreyting að viska fjöldans fái að ráða.
ADVEL skipt upp
Starfsemi lögmannsstofunnar ADVEL hefur verið skipt upp í tvö sjálfstæð félög eftir að hluti eigenda stofunnar, þeir Kristinn Hallgrímsson, Sigurður Valgeir Guðjónsson og Óskar Norðmann, hurfu á braut og starfa nú undir merkjum ARTA lögmenn. Kristinn hafði starfað sem lögmaður hjá ADVEL og fyrirrennurum stofunnar allt frá árinu 1988. Í eigendahópi ADVEL, sem samanstendur meðal annars af þeim Ragnari Guðmundssyni, Guðmundi Siemsen og Dóru Sif Tynes, eru nú fimm lögmenn eftir breytingarnar og hefur stofan nú flutt skrifstofur sínar á Hafnartorgið. ADVEL var fyrir í hópi umsvifameiri lögmannsstofa landsins en tekjur hennar á árinu 2019 námu liðlega 360 milljónum króna.
Leó til ÍV
Leó Hauksson, sem starfaði áður meðal annars hjá GAMMA Capital Management, hefur verið ráðinn til Íslenskra verðbréfa á svið markaðsviðskipta félagsins. Þar mun hann starfa á skrifstofu verðbréfafyrirtækisins í Kópavogi en ÍV er sem kunnugt með höfuðstöðvar sínar á Akureyri. Leó, sem er viðskiptafræðingur að mennt og hefur um 20 ára reynslu á fjármálamarkaði, hefur auk þess starfað hjá Kaupþingi, Arion banka, Íslandsbanka og Straumi fjárfestingarbanka.
