Gunnar Ingi Traustason kemur nýr inn í framkvæmdastjórn Wise og fer fyrir nýju sviði vöruþróunar, en samhliða ráðningu Gunnars hafa nokkrar breytingar verið gerðar á framkvæmdastjórn félagsins og framkvæmdastjórum fækkað í fjóra úr sex.

Gunnar kemur frá fyrirtækinu CoreData sem Wise festi kaup á í lok árs 2021, en hann var einn eigenda CoreData. Gunnar hefur starfað í upplýsingatækni alla sína starfstíð, en áður en hann gekk til liðs við CoreData starfaði hann hjá Íslandsbanka . Gunnar Ingi hefur lokið MBA prófi frá Háskólanum í Reykjavík og kerfisfræði frá sama skóla. Hlutverk framkvæmdastjóra nýs sviðs verður meðal annars að styðja enn frekar við uppbyggingu og stefnumótun á vörum félagsins.

Tinni Kári Jóhannesson kemur jafnframt nýr inn til Wise í nýja stöðu og fer fyrir mannauðsmálum en það svið heyrir undir fjármálasvið félagsins sem Elín Málmfríður Magnúsdóttir stýrir. Tinni kemur frá Góðum samskiptum þar sem hann starfaði sem ráðgjafi á sviði vinnustaðamenningar, við mannauðsmál og ráðningar. Áður starfaði Tinni hjá Capacent og Waterstone Human Capital. Tinni lauk meistaraprófsgráðu frá Háskóla Íslands árið 2017.

Nokkrar breytingar hafa einnig verið gerðar á sölusviði félagsins. Björn Þórhallsson hefur verið ráðinn forstöðumaður sviðsins, en Björn hefur starfað á sölusviði Wise frá árinu 2005, nú síðast sem sölustjóri fyrir Ísland. Hallgerður Jóna Elvarsdóttir hefur verið ráðin inn sem sölustjóri en hún starfaði hjá Wise á árunum 2013-2018 og kemur frá Smyril Line þar sem hún starfaði sem forstöðumaður innflutningsdeildar.

Aðrir í framkvæmdastjórn félagsins eru Stefán Þór Stefánsson sem stýrir þjónustu- og ráðgjafasviði og Inga Birna Ragnarsdóttir sem stýrir markaðssviði.

Jóhannes Helgi Guðjónsson, forstjóri Wise, er spenntur fyrir komandi tímum. „Síðustu ár hefur lausnaframboð Wise breikkað mikið til að styðja við þá stafrænu vegferð sem okkar viðskiptavinir eru á. Sú uppbygging heldur áfram og ég er virkilega ánægður að fá Gunnar Inga inn til að leiða okkar vöruþróun inn í nýja tíma. Vegferð Wise felur í sér gríðarlegan vöxt, en starfólki fyrirtækisins hefur fjölgað um tæp 50 prósent á rétt rúmlega tveimur árum. Tinni er einnig lykilmaður í þeirri stefnubreytingu sem Wise er að taka í mannauðsmálum og þróun á vinnustaðamenningu sinni.”

Tinni Kári Jóhannesson, nýr mannauðsstjóri Wise.
Björn Þórhallsson, forstöðumaður sölusviðs Wise.
Hallgerður Jóna Elvarsdóttir, sölustjóri hjá Wise.