Lífeyrissjóðurinn Lífsverk og Íbúðir eldri borgara í Mörk ehf., hafa undirritað samkomulag um langtíma fjármögnun á íbúðum eldri borgara við Suðurlandsbraut 68 – 70. Í samkomulaginu felst að sjóðfélagar Lífsverks njóta ákveðins forgangs við úthlutun á íbúðunum. 

Í fréttatilkynningur frá Lífsverki segir að lífeyrissjóðurinn sé þannig sá fyrsti sem tryggir sjóðsfélögum sínum forgang að íbúðum fyrir eldri borgara. Íbúðirnar við Suðurlandsbraut eru 74 talsins og samkvæmt samkomulaginu munu sjóðsfélagar Lífsverks fá forgang að 20 íbúðum.

„Mikil ásókn er í íbúðir sem þessar og þegar er kominn langur biðlisti að þeim 74 íbúðum sem eru í Mörkinni. Lífsverk fær með þessum samningi forgang að 10 íbúðum sem losna, því næst koma þeir sem eru á almennum biðlistum og þá fær Lífsverk aftur forgang að næstu 10 íbúðum. Að fá Lífsverk að borðinu sem fjármögnunaraðila er góður kostur og ég tel að lífeyrissjóðir muni í æ ríkari mæli snúa sér að slíkum verkefnum,“ segir Gísli Páll Pálsson, framkvæmdastjóri Íbúða eldri borgara í Mörk ehf.

Lífsverk var stofnaður árið 1954 og er opinn lífeyrissjóður fyrir háskólamenntaða. Segir í fréttatilkynningunni að hann hafi verið fyrsti lífeyrissjóðurinn sem byggði á aldurstengdum réttindum, tók upp sjóðsfélagalýðræði og rafrænt stjórnarkjör. Haft er eftir Jóni L. Árnasyni, framkvæmdastjóra Lífsverks, að sjóðurinn hafi leitað leiða til að koma til móts við sjóðsfélaga sem vilja öryggi á efri árum.