Í tilkynningu frá NÆR segirt að matvöruverslanir félagsins séu fyrstu „kláru“ matvöruverslanir á Íslandi. Þar sé hvorki afgreiðslukassa né afgreiðslufólk að finna heldur fari kaupin alfarið í gegnum snjallsíma. Verslanir NÆR eru aðgangsstýrðar með þeim hætti að viðskiptavinir skanna QR kóða úr appi í snjallsíma til að komast inn og byrja að versla. Viðskiptavinir skanna vörur í gegnum appið sem fara í körfu viðkomandi og greiða körfuna í gegnum appið, í fyrstu með því að skrá kortaupplýsingar í appinu en síðar meir verður hægt að greiða með Apple Pay og Google Pay.

Verslanir NÆR verða fyrst og fremst hverfisverslanir, staðsettar á þéttbýlum svæðum á höfuðborgarsvæðinu til að byrja með og verða þær opnar allan sólarhringinn, alla daga ársins þökk sé tækninýjungum.

Öryggismiðstöðin sér um tæknilegar lausnir fyrir aðgengi fyrir viðskiptavini NÆR ásamt þjónustu og umsjón með myndeftirliti verslana þar sem notast er við nýjustu tækni. Öryggiskerfi og myndeftirlitskerfi eru vöktuð með sjálfvirkum hætti í rauntíma af stjórnstöð Öryggismiðstöðvarinnar sem bregst við frávikum og aðvörunum sem frá eftirlitskerfinu berast. Stjórnstöð Öryggismiðstöðvarinnar er einnig opin allan sólarhringinn eins og „klárar“ matvöruverslanir NÆR.

„Við erum mjög spennt fyrir samstarfinu í heild sinni og hlökkum til að halda áfram að þróa og móta okkar nýjustu lausnir fyrir sjálfvirkar matvöruverslanir í náinni samvinnu við stjórnendur NÆR sem búa yfir mikilli þekkingu og sérhæfingu á þörfum slíkra verslana,“ segir Kristinn Loftur Einarsson, deildarstjóri sölu- og markaðssviðs Öryggismiðstöðvarinnar.

„Verslanir af þessum toga sjást í auknum mæli hjá nágrannaþjóðum okkar og hafa gefið góða raun. Samstarfið við Öryggismiðstöðina við þróun og samhæfingu öryggislausna hefur verið til fyrirmyndar og þekking þeirra og reynsla gerir þau að hárréttum aðilum til þess að vinna þetta með okkur,“ segir Þórður Örn Reynisson, framkvæmdastjóri NÆR ehf.