Síminn hefur selt Sensa til upplýsingatæknifyrirtækisins Crayon Group A.S. Heildarvirði Sena í kaupunum er 3.250 milljónir króna. Áætlaður söluhagnaður Símans vegna viðskiptanna er 1,7 milljarður króna. Þetta kemur fram í tilkynningu til Kauphallarinnar.

Áætlað er að uppgjör viðskiptanna muni eiga sér stað eigi síðar en fyrir lok febrúar 2021, að uppfylltum tilteknum skilyrðum, þ.m.t. samþykki Samkeppniseftirlitsins.

Tveir þriðju hlutar kaupverðsins verða greiddir með reiðufé og einn þriðji með hlutabréfum í Crayon Group Holding ASA en fyrirtækið er skráð í norsku kauphöllina. Sá hluti kaupverðsins sem greiddur er með bréfum í Crayon er bundinn til tólf mánaða frá undirritun kaupsamnings. Einn tólfti (1/12) hans er laus til sölu um hver mánaðamót sem líða þar frá.

Með söluandvirðinu styrkist geta Símans til innri og ytri vaxtar en jafnframt er til skoðunar hagkvæmari fjármagnsskipan með mögulegri endurfjármögnun skulda, eins og kom fram í fjárfestakynningu félagsins þann 28. október síðastliðinn. Undanfarin tvö ár hefur EBITDA Sensa verið í kringum 4 prósent af heildar EBITDA Símasamstæðunnar.

Sensa hefur um árabil verið í fararbroddi íslenskra upplýsingatæknifyrirtækja og spannar starfsemi félagsins allt frá rekstri, hýsingu og skýjalausnum til sérfræðiþjónustu og ráðgjafar. Undanfarin ár hefur Sensa byggt markvisst upp þekkingu á hagnýtingu Microsoftlausna. Starfsmenn Sensa eru 115 talsins, þar af vinna 91 við ráðgjöf og upplýsingatækni, segir í tilkynnigunni.

1.700 starfsmenn í 35 löndum

Crayon er með höfuðstöðvar í Ósló. Hjá fyrirtækinu starfa um 1.700 manns en fyrirtækið er með 55 starfsstöðvar í 35 löndum, í Evrópu, Norður-Ameríku, Eyjaálfu og Asíu. Crayon er leiðandi á heimsvísu í eignastýringu hugbúnaðar, skýja- og hugbúnaðarleyfissamningum og tengdri ráðgjafarþjónustu og eru mörg af stærstu fyrirtækjum heims viðskiptavinir fyrirtækisins. Crayon er einn þriggja helstu endursöluaðila hýsingarleyfa fyrir Microsoft í heiminum. Árið 2019 var Crayon valið af Microsoft sem samstarfsaðili ársins við þróun gervigreindar og vélanáms (e. machine learning).

Sensa heldur áfram starfsemi undir eigin merkjum og mun Síminn eftir sem áður vera einn af lykilviðskiptavinum fyrirtækisins. Samhliða gerð kaupsamningsins hafa Síminn og Crayon lagt drög að samstarfi milli félaganna sem mun styrkja vöruframboð og þjónustu Símans á sviði upplýsingatækni fyrir minni og millistór fyrirtæki. Síminn mun því áfram starfa á sviði upplýsingatækni í samstarfi við Sensa og Crayon.

Náttúrulegra heimili

„Sensa er geysisterkt fyrirtæki á sínu sviði, sem við sjáum eftir úr samstæðunni. Með breytingunni fær félagið hins vegar náttúrulegra heimili en fyrr, í samstæðu Crayon sem snýst eingöngu um upplýsingatækniþjónustu til fyrirtækja,“ segir Orri Hauksson, forstjóri Símans. „Krafta Crayon viljum við nýta til að lækka kostnað Símans sjálfs af upplýsingatækni og hugbúnaðarleyfum, en mestu skiptir að fyrirtækjaþjónusta Símans mun í samstarfi við Crayon geta veitt íslenskum fyrirtækjum af öllum stærðum heilsteyptari þjónustu en fyrr, það er upplýsingatækni og fjarskipti í einum pakka. Síminn mun með sölu á Sensa þannig fara út úr eignarhaldi á sérhæfðu upplýsingatæknifyrirtæki, en samstarf við Crayon samstæðuna í heild eftir söluna opnar ný tækifæri.“