Sigyn Jónsdóttir hefur verið ráðin framkvæmdastjóri hugbúnaðarþróunar hjá Empower og mun leiða þróun jafnréttishugbúnaðarins Empower Now.

Sigyn kemur til Empower frá hugbúnaðarfyrirtækinu Men&Mice þar sem hún var forstöðumaður þjónustu og ráðgjafar til viðskiptavina. Sigyn er varaformaður stjórnar Tækniþróunarsjóðs og var formaður Ungra athafnakvenna árin 2017-2019. Hún hefur einnig starfað hjá Meniga og Seðlabanka Íslands.

Sigyn er með B.Sc gráðu í hugbúnaðarverkfræði frá Háskóla Íslands og meistaragráðu í stjórnun frá Columbia-háskóla í New York.

„Við erum afar ánægð með að fá Sigyn í stjórnendateymi Empower. Fyrir utan víðtæka reynslu við hugbúnaðargerð, nýsköpun og teymisstjórnun þá hefur hún einnig mikla ástríðu fyrir jafnréttismálum. Það er mikill fengur fyrir okkur að fá jafn öfluga konu og Sigyn inn í stjórnendateymið og við hlökkum til að vinna með henni að frekari þróun Empower Now,. Segir Þórey Vilhjálmsdóttir, framkvæmdastjóri Empower.“

Empower er nýsköpunarfyrirtæki á sviði jafnréttis og fjölbreytni en nýlega var tryggði fyrirtækið sér 300 milljóna króna fjármögnun frá Frumtaki og Tennin. Fjármagnið nýtist félaginu við áframhaldandi þróun og markaðssetningu á hugbúnaðarlausninni Empower NOW sem gerir fyrirtækjum og stofnunum kleift að ná yfirsýn yfir stöðu jafnréttismála, setja sér mælanleg markmið og fræða starfsfólk í gegnum stafrænar leiðir þar sem áherslan er að styðja við uppbyggingu á jákvæðri fyrirtækjamenningu með jafnrétti og fjölbreytni að leiðarljósi.

Sygin segist lengi hafa haft augastað á Empower og hrifist af nálguninni á jafnréttismál og vinnustaðamenningu.

„Ég er virkilega spennt að ganga til liðs við framsýnt nýsköpunarfyrirtæki og hlakka til að byggja upp fjölbreytt og skapandi hugbúnaðarteymi. Að leiða þróun á lausn sem þjónar göfugum tilgangi er einstakt tækifæri fyrir mig og sameinar reynslu mína úr hugbúnaðargeiranum við ástríðuna fyrir jafnréttismálum,“ segir Sygin