Sigurður Orri Guðmundsson hefur verið ráðinn framkvæmdastjóri NeckCare Holding ehf. en hann sat áður í stjórn félagsins. Þorsteinn Geirsson, fráfarandi framkvæmdastjóri, mun áfram starfa hjá félaginu og taka við stöðu nýsköpunarstjóra félagsins. Frá þessu er greint í fréttatilkynningu.

Sigurður Orri hefur starfað hjá erlendum fyrirtækjum og var búsettur í Kaupmannahöfn frá 2012-2019 og í Bandaríkjunum frá 2019-2021. Hann var framkvæmdastjóri sölu- og markaðssviðs hjá danska hugbúnaðarfyrirtækinu Siteimprove, fyrst í Evrópu og síðar í Bandaríkjunum. Þá var hann framkvæmdastjóri viðskiptasviðs hjá danska félaginu Airtame og bar ábyrgð á sölu, þjónustu og markaðssetningu félagsins á alþjóðavísu. Sigurður Orri er fjármálahagfræðingur með M.Sc. gráðu frá Kaupmannahafnarháskóla.

„Ég er ótrúlega spenntur fyrir þeirri vegferð sem NeckCare er á og þakklátur fyrir tækifærið. Það eru forréttindi að fá að leiða vel fjármagnað nýsköpunarfyrirtæki og vinna með öllu því frábæra fólki sem starfar hjá félaginu. Vísindin, hugvitið og tæknin að baki vörum NeckCare eru í fremstu röð og ég hlakka til að takast á við það einstaka tækifæri sem við stöndum frammi fyrir. Það verður frábært að hafa Þorstein áfram innan handar og halda áfram því góða starfi sem hann hefur verið unnið fyrir félagið fram til þessa. Núna erum við tilbúin til þess að taka stór skref inn á Bandaríkjamarkað og koma vörum félagsins í hendur öflugra viðskiptavina á þeim stóra markaði. Markmið NeckCare breytist hins vegar ekki; að hjálpa fólki sem glímir við hálsáverka og verki að ná bata” segir Sigurður Orri, nýr framkvæmdastjóri NeckCare.

„Það er sérlega ánægjulegt að fá tækifæri til að styðja nýjan framkvæmdastjóra í þeim fjölbreyttu verkefnum sem starf framkvæmdastjóra NeckCare sannarlega er. Sigurður Orri er vel menntaður, með mikla alþjóðlega reynslu og á allan hátt mjög efnilegur. Samhliða því að starfsemi fyrirtækisins færist í auknu mæli inn á stærsta heilbrigðistæknimarkað veraldar, Bandaríkjamarkað, þá mun reynsla hans og þekking á SaaS hugbúnaði nýtast félaginu vel og það er ekki nokkur vafi í mínum huga að félagið muni taka stór skref fram á við á næstu mánuðum. Hann mun styrkja teymið okkar gríðarlega mikið. Hlutverk mitt mun vissulega breytast en verkefnið er það sama þ.e. að gera gott fyrirtæki betra“ segir Þorsteinn Geirsson, fráfarandi framkvæmdastjóri NeckCare.