Hljómsveitin Sigur Rós segir að þeir hafi alltaf haft fullan ásetning að standa skil á skattframtölum sínum. Þeir harma að málið þurfi að fara fyrir dómstóla. Í tilkynningu segir að þeir hafi ráðið sérfræðinga til að sjá um bæði framtölin og samskipti við yfirvöld en í ljós hafi komið að bæði hafi röngum framtölum verið skilað, og þeim skilað of seint.

Greint var frá því fyrr í dag að fjórir nú­verandi og fyrr­verandi liðs­menn Sigur Rósar og einn endur­skoðandi á­kærðir fyrir meiri háttar skatta­laga­brot. Samkvæmt ákærunni eiga að hafa komist hjá að greiða 150 milljónir í skatt. Brotin varða allt að sex ára fangelsi og háum sektum.

Í tilkynningu sem send var út fyrir hönd hljómsveitarmeðlima segir að skil á framtölum hljómsveitarmeðlima á tímabilinu 2010 til 2014 hafi verið til skoðunar hjá yfirvöldum í nokkur ár. Í desember á síðasta ári hafi ríkisskattstjóri fallist á allar innsendar skýringar og upplýsingar og því hafi enginn ágreiningur verið á milli skattyfirvalda og hljómsveitarmeðlima.

Héraðssaksóknari hafi samt sem áður ákveðið að ákæra hljómsveitina vegna vanframtalinna tekna. Meðlimir hljómsveitarinnar segja að þeir harmi að mál þeirra þurfi að fara dóm vonast á sama tíma að málsaðstæður skýrist. Þeir segja að þeir hafi „ávallt haft fullan ásetning til að standa í réttum skilum við skattyfirvöld og stóðu í þeirri trú að það hefði verið gert.“

„Hljómsveitarmeðlimir eru tónlistarmenn og ekki sérfróðir í bókhaldi og alþjóðlegum viðskiptum – hvað þá í framtalsgerð og skattskilum. Þess vegna réðu þeir viðurkennda sérfræðinga til að annast bókhald og öll samskipti við íslensk skattyfirvöld. En í ljós hefur komið að röngum framtölum var skilað til ríkisskattstjóra og/eða þeim skilað alltof seint. Á sama tíma töldu hljómsveitarmeðlimir að þessi mál væru í lagi og í höndum fagmanna,“ segir Bjarnfreður Ólafsson hjá LOGOS lögmannsþjónustu, í tilkynningunni.

Hann segir að það verði nú verkefni héraðssaksóknara að sanna að meðlimir Sigur Rósar hafi sjálfir gerst sekir „ um stórfellda vanrækslu á framtalsskyldu sinni.“

Hann segir að hann sjái ekki hvernig það verði hægt og að ákvörðun héraðssaksóknara valdi þeim vonbrigðum.

Undir yfirlýsinguna skrifa þeir Dean O´Connor og John Best Fyrir hönd Sigur Rósar.

Tilkynning í heild sinni:

Yfirlýsing fyrir hönd Sigur Rósar

Skil á skattframtölum hljómsveitarmeðlima fyrir árin 2010-2014 hafa verið til skoðunar hjá yfirvöldum í nokkur ár. Í desember síðastliðnum féllst ríkisskattstjóri á allar innsendar upplýsingar og útskýringar og því er enginn ágreiningur á milli þeirra og skattyfirvalda.

Héraðssaksóknari hefur hins vegar tekið ákvörðun um að ákæra hljómsveitarmeðlimi vegna vanframtalinna tekna. Hljómsveitarmeðlimir harma að málið þurfi að fara fyrir dóm en vonast á sama tíma til þess að málsástæður þeirra skýrist. Þeir hafi ávallt haft fullan ásetning til að standa í réttum skilum við skattyfirvöld og stóðu í þeirri trú að það hefði verið gert.

Bjarnfreður Ólafsson, LOGOS lögmannsþjónustu: „Hljómsveitarmeðlimir eru tónlistarmenn og ekki sérfróðir í bókhaldi og alþjóðlegum viðskiptum – hvað þá í framtalsgerð og skattskilum. Þess vegna réðu þeir viðurkennda sérfræðinga til að annast bókhald og öll samskipti við íslensk skattyfirvöld. En í ljós hefur komið að röngum framtölum var skilað til ríkisskattstjóra og/eða þeim skilað alltof seint. Á sama tíma töldu hljómsveitarmeðlimir að þessi mál væru í lagi og í höndum fagmanna. Það verður núna verkefni Héraðssaksóknara að færa sönnur fyrir því að hljómsveitarmeðlimir hafi sjálfir gerst sekir um stórfellda vanrækslu á framtalsskyldu sinni. Í ljósi málsatvika fæ ég ekki séð hvernig það verður hægt og þess vegna veldur það vonbrigðum að embætti Héraðssaksóknara hafi tekið ákvörðun um ákærur á hendur þeim.“

29. mars, 2019

Fyrir hönd Sigur Rósar

Dean O´Connor, John Best