Sigríður Guðmundsdóttir hefur tekið við starfi framkvæmdastjóra Fræðslumiðstöðvar atvinnulífsins (FA).

Sigríður hefur starfað í mannauðs- og fræðslumálum um árabil en hún starfaði áður hjá Eimskip sem fræðslu- og mannauðsstjóri félagsins en einnig sem ráðgjafi hjá Attentus – Mannauður og ráðgjöf.

Sigríður hefur lokið MBA námi frá Háskóla Íslands og er menntuð sem grunnskólakennari frá Háskólanum á Akureyri og er með Dipl.Ed gráðu í Fræðslustarfi og stjórnun frá HÍ.

Sigríður tekur við starfinu af Sveini Aðalsteinssyni sem hefur verið ráðinn framkvæmdastjóri nýsköpunarverkefnisins Orkídeu.

Verkefni Fræðslumiðstöðvar atvinnulífsins eru að vera leiðandi í að greina, meta og auka hæfni í atvinnulífinu og styðja þannig við þróun starfsmanna til að afla sér menntunar eða bæta stöðu sína.