Sif Jóhannsdóttir hefur verið ráðin rekstrarstjóri samskiptafélagsins Aton.JL. Sif hefur undanfarin 2 ár starfað sem ráðgjafi hjá fyrirtækinu en tekur nú sæti í framkvæmdastjórn félagsins. Þetta kemur fram í tilkynningu.

Sif útskrifaðist með MBA gráðu frá Háskólanum í Reykjavík 2018 og er einnig með BA gráðu í frönsku og bókmenntum frá Háskóla Íslands. Þá hefur hún lagt stund á nám í verkefnastjórn í UCLA og breytingastjórnun í Harvard.

Sif starfaði lengi við bókaútgáfu, hjá Forlaginu, sem verkefnastjóri útgáfu og síðast við kynningu og sölu á íslenskum höfundum og verkum þeirra erlendis. Þá stýrði Sif um tíma kynningar- og markaðsmálum hjá Forlaginu.

„Framundan eru mörg krefjandi verkefni og tækifæri hjá Aton.JL. Samskipti eru og verða eitt helsta sóknartækifæri fyrirtækja og þar er Aton.JL leiðandi og ætlar að vera áfram. Því er það okkur mikill fengur að fá Sif í framkvæmdastjórn okkar þar sem þekking hennar og reynsla mun styðja við framþróun okkar og vöxt“, segir Ingvar Sverrisson, framkvæmdastjóri Aton.JL.

Aton.JL, samskiptafélag, sérhæfir sig í ráðgjöf um samskipti, stefnumótun, hönnun og markaðssetningu. Hjá Aton.JL starfa yfir 40 sérfræðingar með fjölbreytilegan bakgrunn sem gerir félaginu kleift að nálgast og skipuleggja samskipti viðskiptavina sinna með heildstæðum hætti. Aton.JL er til húsa við Tryggvagötu 10.