Ráðgjafarfyrirtækið Sessor og hugbúnaðarfyrirtækið SalesCloud hafa gert með sér samning sem gerir Sessor kleift að bjóða viðskiptavinum sínum notendavænar og árangursríkar sölu- og afgreiðslulausnir SalesCloud á hagstæðu verði. Sessor er óháð ráðgjafar- og þjónustufyrirtæki á sviði upplýsingatæknimála sem leggur ríka áherslu á að brúa bil á milli rekstraraðila og upplýsingtæknilausna með það fyrir augum að auka sjálfvirkni og bæta rekstraröryggi. Undanfarin ár hafa sérfræðingar Sessor greint ítarlega verklag og nýtingu tæknilegra lausna hjá íþróttafélögum hér á landi. Sú vinna auðveldar fyrirtækinu greiningu á þörfum íþróttafélaga með það að leiðarljósi að aðstoða þau við að hagræða og auka yfirsýn með fullnýtingu tæknilegra lausna. Með hagræðingu skapast tækifæri fyrir íþróttafélög að verja meiri fjármunum í kjarnastarfsemi sína, sem er öflugt íþrótta-og æskulýðsstarf.

„Við erum afar spennt fyrir samstarfi með SalesCloud. Lausnir SalesCloud smellpassa inn í það lausnamengi sem við höfum hannað fyrir íþróttafélög. SalesCloud sölukerfið býður upp á innbyggt kassakerfi í posum og gerir félögum kleift að sjá nákvæmlega hvað er selt og mæla rýrnun. Þar að auki samtengjum við kassakerfið beint við viðskiptakerfi svo allar bókanir milli kerfa séu sjálfvirkar. Með því að velja bestu mögulegar tæknilausnir sem völ er á og binda þær saman hámörkum við sjálfvirkni og bætum gæði í starfsemi íþróttafélaga,“ segir Brynjar Gunnlaugsson framkvæmdastjóri Sessor.

„Við erum á mjög spennandi tímamótum þar sem við höfum náð að styrkja fyrirtækið enn frekar með öflugum ráðningum og nýjum spennandi lausnum. Okkar helsta markmið er að fara áfram fram úr væntingum viðskiptavina og þessi nýi samningur er liður í því. Þegar tvö sterk fyrirtæki koma saman og ná að vinna vel úr verkefnum kemur það viðskiptavinum beggja auðvitað til góða,“ segir Helgi Andri Jónsson stofnandi SalesCloud.