Innlent

Seðlabankinn hækkar stýrivexti

Seðlabankinn segir að aukin verðbólga og hærri verðbólguvæntingar síðustu mánuði hafi lækkað raunvexti Seðlabankans umfram það sem æskilegt er í ljósi núverandi efnahagsástands. Því sé nauðsynlegt að hækka vexti bankans.

Verðbólguhorfur hafa versnað, að sögn Seðlabankans, en á móti vega horfur á að hraðar dragi úr vexti efnahagsumsvifa en áður var talið. Fréttablaðið/Anton Brink

Peningastefnunefnd Seðlabanka Íslands hefur ákveðið að hækka vexti bankans um 0,25 prósentustig. Meginvextir bankans, vextir á sjö daga bundnum innlánum, verða því 4,5 prósent.

Í yfirlýsingu nefndarinnar segir að aukin verðbólga og hærri verðbólguvæntingar síðustu mánuði hafi lækkað raunvexti Seðlabankans umfram það sem æskilegt er í ljósi núverandi efnahagsástands og horfa. Því sé nauðsynlegt að hækka vexti bankans nú.

Hagvöxtur á síðasta ári og á fyrri hluta þessa árs var meiri en fyrri áætlanir höfðu gert ráð fyrir, að því er segir í yfirlýsingunni. Þrátt fyrir vísbendingar um hægari vöxt á seinni hluta ársins er spáð 4,4 prósenta hagvexti á árinu öllu í nóvemberhefti Peningamála. Það er tæplega 1 prósentu meiri vöxtur en bankinn spáði í ágúst. Gert er ráð fyrir að hægja muni á hagvexti á næstu misserum og að spenna hverfi úr þjóðarbúskapnum.

Verðbólga var 2,8 prósent í október, eftir því sem fram kemur í yfirlýsingu peningastefnunefndarinnar. 

„Munurinn milli mælikvarða á verðbólgu með og án húsnæðis hefur ekki verið álíka lítill í rúm fjögur ár. Áfram dregur úr árshækkun húsnæðisverðs en á móti vegur að innflutningsverð hefur hækkað umtalsvert að undanförnu. Að hluta endurspeglar það hækkun olíuverðs á alþjóðamarkaði en gengi krónunnar hefur einnig lækkað frá því í ágúst,“ segir í yfirlýsingunni.

Horfur eru á að verðbólga haldi áfram að aukast, að sögn Seðlabankans, og verði nokkuð yfir markmiði á næsta ári. Þá hafa verðbólguvæntingar hækkað undanfarið og eru nú yfir markmiði á alla mælikvarða. Verðbólguhorfur hafa því versnað en á móti vega horfur á að hraðar dragi úr vexti efnahagsumsvifa en áður var talið.

Peningastefnan mun á næstunni ráðast af samspili minni spennu í þjóðarbúskapnum, launaákvarðana og þróunar verðbólgu og verðbólguvæntinga, að því er segir í yfirlýsingunni.

„Peningastefnunefnd ítrekar að hún hefur bæði vilja og þau tæki sem þarf til að halda verðbólgu við markmið til lengri tíma litið. Haldi verðbólguvæntingar áfram að hækka og festist í sessi umfram markmið mun það kalla á harðara taumhald peningastefnunnar. Aðrar ákvarðanir, einkum á vinnumarkaði og í ríkisfjármálum, hafa þá áhrif á hversu mikill fórnarkostnaður verður í lægra atvinnustigi,“ segir að lokum í yfirlýsingu peningastefnunefndar Seðlabankans.

Athugasemdir

Auglýsing
Auglýsing

Tengdar fréttir

Innlent

Í samstarf við risa?

Innlent

Þróa leiðir fyrir markaðssetningu í Kína

Innlent

Falla frá kaupréttum í WOW air

Auglýsing

Nýjast

Vilja marg­feldis­kosningu fyrir aðal­fund

O'Leary: Lág fargjöld grisjuðu WOW air út

Simmi hættur hjá Keiluhöllinni

Eim­skip breytir skipu­lagi og lækkar for­stjóra­launin

Varaformaðurinn kaupir fyrir fimm milljónir í Högum

Segir hörð átök skaða orðspor og afkomu

Auglýsing