Erlent

Samrunar yfirvofandi á evrópskum flugmarkaði

Samrunar og yfirtökur á evrópskum flugmarkaði munu ógna lágu verði flugmiða í álfunni, að mati Lex í Financial Times.

Yfir 200 flugfélög starfa á evrópska flugmarkaðinum og er markaðshlutdeild sex stærstu flugfélaganna aðeins 43 prósent. Fréttablaðið/Getty

Samrunar og yfirtökur eru líkast til í vændum á evrópskum flugmarkaði, að því er segir í dálkinum Lex í Financial Times, einum virtasta fjármáladálki heims. Þar er bent á að samanlögð markaðshlutdeild sex stærstu flugfélaga Bandaríkjanna sé um 90 prósent á meðan hlutdeild sex stærstu flugfélaga Evrópu sé aðeins 43 prósent.

„Hörð samkeppni í Evrópu - ásamt hærri reglugerðakostnaði - gerir félögum þar erfiðara um vik að hagnast,“ segir Lex sem bendir - máli sínu til stuðnings - á að hagnaður evrópskra flugfélaga sé að meðaltali 7,58 dalir á hvern farþega. Það sé meira en helmingi minni hagnaður en í bandaríska fluggeiranum.

Yfir 200 flugfélög starfa í Evrópu, að sögn Lex, eða meira en tvöfalt fleiri en í Bandaríkjunum þar sem erlendum fyrirtækjum er meinað að sinna innanlandsflugi.

Lex bendir á að samrunabylgja hafi á sínum tíma gengið yfir bandaríska markaðinn og ekki sé ólíklegt að slíkt hið sama gerist í Evrópu, sér í lagi ef olíukostnaður, sem er einn stærsti kostnaðarliður flugfélaga, helst áfram hár.

Michael O'Leary, forstjóri Ryanair, segir engan vafa á því að evrópskum flugfélögum muni fækka með samrunum og yfirtökum. Fréttablaðið/Getty

Michael O’Leary, forstjóri Ryanair, sagði í maí síðastliðnum að sameiningar á evrópskum flugmarkaði myndu gera það að verkum að evrópski markaðurinn yrði á endanum eins byggður upp og sá bandaríski, þar sem fjögur til fimm stór flugfélög ráða ríkjum. Lex bendir á að þreifingar um sameiningar hafi þegar átt sér stað. Þannig hafi IAG, eigandi British Airways, tvívegis gert yfirtökutilboð í allt hlutafé Norwegian á þessu ári, þó án árangurs.

Í umfjöllun Lex segir jafnframt að eftir verulegar lækkanir á verði flugmiða í Evrópu á undanförnum 25 árum sé útlit fyrir að sameiningar flugfélaga muni - til lengri tíma litið - snúa þeirri þróun við. Til skamms tíma muni hækkandi olíuverð hins vegar leiða til hærri flugfargjalda. Margt eigi auk þess eftir að ráðast af því hvort flugfélög dragi úr framboði sínu. Um þessar mundir er framboðið að aukast um sex prósent, að sögn Lex, en búist er við því að það hægist á aukningunni í vetur.

Athugasemdir

Auglýsing
Auglýsing

Tengdar fréttir

Erlent

Spáir gjald­þrotum flug­fé­laga í vetur

Erlent

Mesta dagshækkun í meira en tvö ár

Erlent

Minni hagnaður Ryanair

Auglýsing

Nýjast

Sam­keppnis­yfir­völd harð­orð í garð Isavia

Festi hækkar afkomuspá sína

Úr­vals­vísi­talan lækkaði og krónan veiktist

WOW til Vancouver

Erfitt að taka þátt í „þessari svo­kölluðu byltingu“

Erlend félög fælast mikinn kostnað

Auglýsing