Samiðn hvetur íslensk stjórnvöld til þess að framlengja átakið „Allir vinna“. Samkvæmt fjárlagafrumvarpinu 2022 er ekki gert ráð fyrir að umrætt átak haldi áfram í núverandi mynd. Þetta kemur fram í tilkynningu.

Samiðn fagnar þeim árangri sem náðst hefur í átakinu „Allir vinna” en á þessu ári hafa endurgreiðslur numið um 9,2 milljörðum króna og námu tæpum 20 milljörðum króna árið 2020.

„Ljóst er að þetta hefur verið mikilsvert innlegg í þeim árangri sem íslenskt samfélag hefur þó náð í afar erfiðu og krefjandi árferði,“ segir í tilkynningunni.

„Það er afar mikilvægt að halda hjólum atvinnulífsins gangandi og stuðla að því að skila mikilvægum virðisaukandi verkefnum til samfélagsins. Átakið örvar hagkerfið með því að hvetja til aukinna umsvifa í kjölfar Covid-19. Samiðn hefur lagt mikla áherslu á átakið og við hvetjum stjórnvöld til að framlengja það,“ segir Hilmar Harðarson, formaður Samiðnar, í tilkynningunni.