Samherji sendi fyrrverandi rannsóknarlögreglumann hjá sérstökum saksóknara til Namibíu árið 2016 þegar grunur kom upp um að ekki væri allt með feldu í rekstri fyrirtækisins þar í landi. Eftir nokkurra mánaða vinnu fyrrverandi rannsóknarlögreglumannsins var niðurstaðan sú að segja upp Jóhannesi Stefánssyni, fyrrverandi stjórnenda Samherja í Namibíu, vegna „óásættanlegrar framgöngu hans og hegðunar“.

Þetta kemur fram í tilkynningu frá Samherja, sem var send út vegna þess að fyrirtækið kveðst hafa orðið þess áskynja að Jóhannes hafi farið til fjölmiðla og lagt fram alvarlegar ásakanir á hendur stjórnendum Samherja. Fjallað verður um málið í fréttaskýringaþættinum Kveik á morgun á RÚV.

Norsk lögmannsstofa rannsakar nú starfsemina

„Við tökum þessu mjög alvarlega og höfum ráðið alþjóðlegu lögmannsstofuna Wikborg Rein í Noregi til að framkvæma ítarlega rannsókn á starfseminni í Afríku. Þar til niðurstöður þeirrar rannsóknar liggja fyrir munum við ekki tjá okkur um einstakar ásakanir,“ segir í tilkynningu Samherja.

Fyrirtækið segist þá hafa óskað eftir því sérstaklega að setjast niður með RÚV og fara yfir upplýsingar sem það telur skipta máli í tengslum við fyrirhugaða umfjöllun á morgun. „Þeirri beiðni hefur jafnharðan verið hafnað og hefur Ríkisútvarpið aðeins talið sér fært að ræða við okkur fyrir framan myndavélar. Teljum við þær upplýsingar sem við búum yfir vera með þeim hætti að slíkt væri tillitslaust vegna hagsmuna þeirra einstaklinga sem málið varðar.“

Þá segir að fyrirtækið hafi árið 2016 ráðið fyrrverandi rannsóknarlögreglumann hjá sérstökum saksóknara til að rannsaka starfsemina í Namibíu eftir að hafa orðið þess áskynja að þar væri ekki allt með feldu. Í kjölfarið var ákveðið að reka Jóhannes, sem Samherji segir svo hafa „beint og ásamt starfsmönnum sínum, krafist hárra fjárhæða frá Samherja.“

Lá alltaf fyrir að reksturinn í Namibíu væri tímabundinn

„Samherji hefur lagt sig fram um að vinna í samræmi við lög og reglur sem gilda í þeim löndum sem félagið starfar í. Höfum við í því samhengi unnið náið með stjórnvöldum í Namibíu, bæði með skattyfirvöldum og Seðlabanka Namibíu,“ segir í tilkynningunni. „Má þar nefna að frá síðari hluta árs 2016 hefur öllum virðisaukaskattskyldum fyrirtækjum í Namibíu verið skylt að fara í gegnum ítarlega skoðun hjá skattyfirvöldum á tveggja mánaða fresti þar sem allir reikningar eru yfirfarnir. Á það við um okkar félög eins og öll önnur fyrirtæki í Namibíu.“

Fyrirtækið segir alltaf hafa legið fyrir að aðeins væri um tímabundinn rekstur í landinu að ræða. „Gerðir voru samningar við ýmsa kvótahafa, allt frá samningum til örfárra mánaða til fimm ára en umræddir samningar eru nú allir útrunnir. Þá hafa namibísk stjórnvöld unnið að breytingum á fiskveiðistjórnunarkerfinu á undanförnum árum með það fyrir augum að draga úr notkun frystitogara og auka vægi landvinnslu ásamt því að leggja aukna áherslu á að eignarhald og stjórnun sé í höndum innlendra aðila.“ Þá kemur fram að eitt skip Samherja þegar verið selt og að viðræður um sölu á öðrum rekstri í Namibíu til þarlendra aðila hafi staðið yfir síðan í byrjun þessa árs.

„Öll starfsemi Samherja og tengdra félaga var undir ítarlegri rannsókn árum saman án þess að nokkuð athugavert hafi fundist. Var allt okkar bókhald, tölvupóstar og öll önnur gögn skoðuð ítarlega, þar með talið þeirra félaga sem sinntu útgerð við strendur Afríku frá árinu 2007. Við munum ekki nú, frekar en þá, sitja undir röngum og villandi ásökunum frá fyrrverandi starfsmanni sem enn á ný eru matreiddar af sömu aðilum og fjölmiðlum og í Seðlabankamálinu,“ er að lokum haft eftir Þorsteini Má Baldvinssyni, forstjóri Samherja, í tilkynningunni.