Umbúðafyrirtækið Samhentir Kassagerð hefur komist að samkomulagi við Kassagerð Reykjavíkur um kaup á lager og viðskiptasamböndum félagsins. Sameinaður rekstur verður rekinn undir merkjum Samhentra. Þetta kemur fram í fréttatilkynningu.

Í tilkynningunni segir að erfitt rekstrarumhverfi og markaðsaðstæður geri það að verkum að óhjákvæmilegt hafi verið fyrir félögin að fara þessa leið til þess að tryggja áframhaldandi starfsemi.

Kaupin eru háð samþykki Samkeppniseftirlitsins en þar til niðurstaða eftirlitsins liggur fyrir verða félögin rekin með óbreyttu sniði. Fjármálaráðgjöf Deloitte hafði umsjón með ferlinu.

Samhentir Kassagerð var stofnað árið 1996 og er þjónustufyrirtæki sem býður alhliða lausnir í umbúðum og öðrum rekstrarvörum. Félagið selur umbúðir og veitir ráðgjöf um lausnir, efnisval, hönnun og tækjakost. Viðskiptavinir félagsins starfa meðal annars í matvælaframleiðslu, sjávarútvegi og iðnfyrirtæki í margs konar framleiðslu.

Kassagerð Reykjavíkur er elsta umbúðafyrirtæki á Íslandi, stofnað árið 1932. Árið 2008 var það ásamt Gutenberg sameinað undir nafninu Oddi en í fyrra var nafninu aftur breytt í Kassagerð Reykjavíkur í kjölfar kaupa Prentmets á allri prentvinnslu og tækjum Odda.

Kristján Geir Gunnarsson, framkvæmdastjóri Kassagerðar Reykjavíkur, segir í tilkynningunni að gríðarlega krefjandi rekstrarumhverfi geri þessi viðskipti nauðsynleg. „Ég vonast til þess að við þessi kaup náist fram hagkvæmni til að takast á við þær áskoranir sem flest fyrirtæki hér á landi eru að eiga við. Ég óska eigendum Samhentra góðs gengis í næstu skrefum,“ nefnir hann.

Haft er eftir Jóhanni Oddgeirssyni, framkvæmdastjóra Samhentra, að Kassagerð Reykjavíkur eigi sér ríka sögu sem eitt elsta fyrirtæki landsins. „Við tökum auðmjúk við keflinu með þeim og vitum að hjá Kassagerðinni starfar ötull hópur fólks með sérþekkingu sem við bjóðum velkomna í hóp okkar. Við teljum það mjög mikilvægt að veita viðskiptavinum Kassagerðarinnar áfram góða þjónustu og munum gera allt í okkar valdi að tryggja að þessi umskipti gangi vel fyrir sig,“ segir Jóhann.