Nýja móðurfélagið hefur fengið nafnið Travel Connect en Nordic Visitor keypti nýverið félagið Iceland Travel af Icelandair og hafði áður fest kaup á Terra Nova. Auk þess er Magma Hotel á Kirkubæjarklaustri og rekstur Iceland Tours og Nine Worlds í eigu nýs, sameinaðs félags.

Fyrirtækin, sem eru hvert um sig leiðandi á sínu sviði og búa að sterkum viðskiptasamböndum, munu öll starfa áfram sjálfstætt undir nýju móðurfélagi. Lögð áhersla á að deila þekkingu á milli fyrirtækjanna og mynda sterka heild í faglegri þjónustu við erlenda ferðamenn, segir í tilkynningu frá hinu nýja félagi. Nordic Visitor er auk þess með starfsemi í Svíþjóð og Skotlandi en hátt í 200 manns starfa hjá sameinuðu félagi.

Ásberg Jónsson, fyrrum framkvæmdastjóri Nordic Visitor, mun gegna starfi framkvæmdastjóra Travel Connect.

Við breytingarnar tekur Sigfús Steingrímsson við starfi framkvæmdastjóra Nordic Visitor en hann leiddi áður bókunar- og þróunardeild fyrirtækisins.

„Fyrirtækin eru að mörgu leyti ólík en með samrunanum viljum við efla faglegan grunn þjónustunnar og styrkja okkar samkeppnishæfni gagnvart sambærilegum erlendum fyrirtækjum. Ég hef trú á því að ferðaþjónusta á Íslandi muni fljótt ná fyrri styrk og að öflugt samstarf fyrirtækjanna styðji við uppbyggingu íslenskrar ferðaþjónustu” segir Ásberg Jónsson framkvæmdastjóri Travel Connect.

"Þetta er gríðarlega spennandi verkefni. Staða Nordic Visitor er sterk og við sjáum mikil sóknarfæri í stöðunni sem er að skapast eftir faraldur og skert ferðafrelsi. Salan hefur aukist jafnt og þétt síðustu mánuði og ljóst að áfangastaðir okkar í norðanverðri Evrópu höfða sterkt til ferðaþyrstra viðskiptavina. Ég hlakka til að leiða fyrirtækið inn í nýja tíma í ferðaþjónustu ásamt frábæru starfsfólki Nordic Visitor" segir Sigfús Steingrímsson framkvæmdastjóri Nordic Visitor.