Íslenska hugbúnaðarfyrirtækið SalesCloud hefur ráðið til sín fjóra nýja starfsmenn, þau Maríu Björk Gísladóttur, Friðrik Má Jensson, Pálma Þormóðsson og Rúnar Leví Jóhannsson. Þetta kemur fram í tilkynningu.

María Björk er ráðin inn til að hafa yfirumsjón með bókhaldi félagsins en hún er viðurkenndur bókari og er um þessar mundir að ljúka við BS gráðu í viðskiptafræði frá Háskólanum á Bifröst. Áður en María kom yfir til SalesCloud starfaði hún meðal annars hjá fyrirtækjunum CCP og Actavis.

Friðrik Már Jensson hefur verið ráðinn í innleiðingardeild SalesCloud og mun þar sjá um innleiðingar á viðskiptalausnum félagsins. Friðrik er með BA gráðu í kvikmyndafræði, diploma í vefmiðlun og meistaragráðu í hagnýtri menningarmiðlun frá Háskóla Íslands. Áður en Friðrik réði sig til SalesCloud starfaði hann hjá Tripadvisor.

Pálmi Þormóðsson kemur til með að starfa sem forritari í þróunardeild SalesCloud en hann er menntaður tölvunarfræðingur frá Háskólanum í Reykjavík og starfaði með námi sem stuðningsfulltrúi í Klettaskóla.

Annar forritari bætist við hjá SalesCloud en Rúnar Leví Jóhannsson kemur til með að starfa sem slíkur en hann stundar einnig nám í hugbúnaðarverkfræði við Háskólann í Reykjavík.

„Það er virkilega ánægjulegt að fá fleiri öfluga teymisfélaga til liðs við okkur til að takast á við þær spennandi áskoranir sem við stöndum frammi fyrir. Ráðningarnar koma samhliða auknum umsvifum félagsins og endurspegla vöxt SalesCloud en með þeim erum við bæði að styrkja vörur og þjónustur sem fyrir eru, eins og Yess markaðstorgið, og svo þróa nýjar lausnir. Við erum í raun full þakklætis og ætlum að halda áfram að leggja allt í að halda viðskiptavinum okkar ánægðum,“ segir Helgi Andri Jónsson, framkvæmdastjóri SalesCloud.