Rússland hefur fengið um 62 milljarða evra í tekjur fyrir útflutning á eldsneyti á síðustu tveimur mánuðum, frá því stríðið í Úkraínu hófst. Það er tæp tvöföldun frá því fyrir stríðið. Landið hefur grætt á hækkuðu eldsneytisverði þrátt fyrir að minna sé flutt út.
Landið flutti eldsneyti að andvirði 44 milljarða til Evrópusambandsins síðustu tvo mánuði, samanborið við 140 milljarða evra allt síðasta árið, eða um 12 milljarða evra á mánuði.
Stjórnvöld margra landa hafa leitast eftir því að setja þvingur á Rússland vegna stríðsins en erfiðlega hefur reynst fyrir Evrópu að koma sér undan innflutningi frá Rússlandi enda fá lönd í Evrópu um fjörutíu prósent af sínu eldsneyti frá Rússlandi.
Útflutningur eldsneytis frá Rússlandi hefur dregist nokkuð saman, um allt að þrjátíu prósent. Minna framboð hefur leitt til verðhækkana sem hafa bætt upp fyrir tap Rússlands með meiru.
Evrópusambandið er því í erfiðri stöðu því meiri þvinganir á eldsneyti frá Rússlandi gæti leitt til enn meiri verðhækkana nema dregið sé þeim mun meira úr innflutningi.
Þýskaland flutti mest inn af eldsneyti frá Rússlandi síðustu tvo mánuði, eða að andvirði níu milljarða evra.
Rússland hefur hótað að skrúfa fyrir útflutningi á eldsneyti til Evrópu sem viðbragð við efnahagsþvingunum. Á miðvikudaginn var útflutningur til Póllands og Búlgaríu stöðvaður í skamma stund en hófst aftur síðar sama dag.
