Rúmlega helmingur stjórnenda sem eiga aðild að Félagi atvinnurekenda og svöruðu könnun telur að ekkert svigrúm sé til launahækkana seinna á árinu. Rúmlega þriðjungur að það væri á bilinu 2-3 prósent. Að meðaltali töldu fyrirtækin sem svöruðu könnuninni svigrúm til 1,4 prósent hækkunar launakostnaðar. Þetta kemur fram í frétt á vef FA.

Könnunin var gerð dagana 31. janúar til 4. febrúar. Hún var send í tölvupósti til 163 félagsmanna með beina félagsaðild. Af þeim svöruðu 57, eða 35 prósent. Svarhlutfall í könnunum undanfarinna ára hefur verið á bilinu 31 prósent til 64 prósent.

Um 80 prósent félagsmanna FA, sem svöruðu könnun félagsins í síðustu viku, sjá fram á að þurfa að hækka verð vegna hækkana á erlendum aðföngum. Þannig sögðust 46 prósent mjög sammála fullyrðingunni „fyrirtækið mitt sér fram á að þurfa að hækka verð vegna hækkana á erlendum aðföngum“ og 34 prósent sögðust sammála.

Enn fleiri sögðu að verð á erlendum aðföngum til fyrirtækisins hefði hækkað vegna hækkana á alþjóðamörkuðum, eða 89 prósent. Þá sögðust 78 prósent svarenda þegar hafa þurft að hækka verð.