Rósa Dögg Ægisdóttir hefur verið ráðin framkvæmdastjóri hugbúnaðarhússins Reon ehf. Elvar Örn Þormar, fráfarandi framkvæmdastjóri og einn stofnenda Reon mun í framhaldinu leiða fjárfestingastarfsemi fyrirtækisins.

Reon var stofnað 2011 og sérhæfir sig í þróun stafrænna lausna og nýsköpun. Hjá fyrirtækinu starfa nú 25 sérfræðingar með þverfaglega þekkingu á hugbúnaði, tækni- og viðskiptaþróun.

Rósa Dögg hefur síðastliðin fjögur ár starfað sem þróunarstjóri Reon og setið í framkvæmdastjórn félagsins undanfarin þrjú ár. Í starfi sínu hefur hún stýrt stafrænum verkefnum fyrir mörg af stærstu fyrirtækjum landsins, meðal annars fyrir Krónuna, N1, ELKO og Vörð auk opinberra stofnana. Hún hefur sömuleiðis sinnt vörustýringu fyrir eigin vörur Reon, til dæmis snjallforritið Team Health og áskriftarkerfið Vefáskrift. Þá situr hún í stjórn Reon Ventures sem fjárfestir í og aðstoðar sprotafyrirtæki á hugmyndastigi. Hún mun í nýju starfi leiða stefnumótun fyrirtækisins, skerpa á framtíðarsýn þess og fylgja nýjum og eldri viðskiptavinum í ferlum Reon.

Rósa Dögg er með B.S. gráðu í iðnaðarverkfræði frá Háskóla Íslands.

Rósa Dögg Ægisdóttir, framkvæmdastjóri Reon:

„Ég hlakka mjög til að takast á við þetta spennandi og krefjandi verkefni. Starfsemi Reon hefur þróast mikið á liðnum árum og ég hef verið svo heppin að hafa spilað stórt hlutverk í þeirri vinnu ásamt Elvari. Ég bý að þeirri reynslu og mun byggja á henni. Fram undan eru spennandi tímar enda er mikil eftirspurn á markaði fyrir stafrænar lausnir. Við höfum sett okkur skýr markmið fyrir komandi ár og með góðu starfsfólki munum við fylgja þeim markmiðum eftir.“

Elvar Örn Þormar, fráfarandi framkvæmdastjóri og einn stofnenda Reon:

„Rósa Dögg hefur gegnt lykilhlutverki í vexti Reon á undanförnum árum, hún er framúrskarandi leiðtogi fyrir þróunarteymin okkar og afrakstur af framlagi hennar hefur hvort tveggja í senn bætt hag viðskiptavina okkar og gert Reon að einstökum vinnustað. Samhliða því sem hún tekur við starfi framkvæmdastjóra hlakka ég til að takast á við ný verkefni og sinna þróun Reon og dótturfélaga til lengri tíma.“