Álframleiðandinn Rio Tinto Alcan mun loka álveri sínu við Tiwai Point á Nýja-Sjálandi í ágúst á næsta ári, að því er kemur fram í tilkynningu frá fyrirtækinu. Forsvarsmenn fyrirtækisins segja að ekki hafi tekist að semja um lægra orkuverð fyrir álverið og þess vegna verði því lokað.

Álverið, sem hóf framleiðslu árið 1971, fær súrál frá báxíthreinsistöðvum Rio Tinto í Ástralíu og flytur mest af framleiðslunni til Japan. Mikil uppbygging hefur átt sér stað í álframleiðslu Kína á liðnum árum og því hefur samkeppnisstaða rótgrónari álframleiðenda í Kyrrahafinu versnað nokkuð gagnvart kaupendum í Asíu.

Engin önnur álver eru starfrækt á Nýja-Sjálandi. Álverið við Tiwai Point er knúið af endurnýjanlegri orku sem framleidd er með vatnsafli á Manapouri-vatnasvæðinu. Uppsett afl virkjunarinnar er 850 megavött, en til samanburðar er uppsett afl Kárahnjúkavirkjunar 690 megavött.

Afkastageta Tiwai Point er um 330 þúsund tonn á ári, samanborið við 190 þúsund tonn í Straumsvík.

Ítrekað hefur verið fjallað um það í fjölmiðlum að Rio Tinto leitist nú við að selja eða loka álverum í sinni eigu sem ekki geta talist hluti af kjarnastarfsemi félagsins. Hafa álver félagsins í Ástralíu, Nýja-Sjálandi og á Íslandi verið nefnd þar til sögunnar, en flest álver Rio Tinto Alcan eru staðsett í Kanada.

Greint var frá því í mars 2018 að norski álfram­leiðand­inn Norsk Hydro hefði gert skuld­bind­andi til­boð um kaup á ál­ver­inu í Straums­vík (ISAL) af Rio Tinto. Í september sama ár féll Norsk Hydro svo frá kaupunum.