Rekstrarafkoma fyrir A og B hluta Hafnarfjarðar var jákvæð um 2,3 milljarða króna á árinu 2020. Fyrir A hluta var afkoman jákvæð um 1,6 milljarða króna.
Í tilkynningu frá bænum kemur fram að þrátt fyrir neikvæð áhrif COVID-19 faraldursins á skatttekjur og útgjöld hafi grunnrekstur bæjarsjóðs verið traustur á síðasta ári. Við það hafi bæst sala á 15 prósenta hlut bæjarins í HS Veitum og lóðasölur sem bæði hafa haft jákvæð áhrif á rekstrarniðurstöðu 2020.
„Hafnarfjörður hefur mætt neikvæðum áhrifum Covid-19 faraldursins með því að styrkja efnahagslegar undirstöður sveitarfélagsins,“ segir Rósa Guðbjartsdóttir bæjarstjóri, í tilkynningunni.
„Á undanförnum árum hefur skuldaviðmið bæjarsjóðs farið stöðugt lækkandi og með sölu á 15% hlut bæjarins í HS Veitum er svo komið að það hefur aldrei verið lægra. Þessi bætta staða gjörbreytir möguleikum bæjarins til að takast á við efnahagslega óvissu af völdum Covid-19. Nú er hægt að snúa vörn í sókn. Við höfum getað haldið uppi öflugri þjónustu við íbúa og markvissri uppbyggingu innviða og stefnum ótrauð á frekari fjárfestingar í bænum á komandi árum. Umtalsverðum fjölda lóða hefur verið úthlutað á undanförnum mánuðum, nýjar byggðir eru að rísa og eldri byggð að þéttast. Því má vænta verulegrar fjölgunar íbúa í Hafnarfirði á komandi árum, til hagsbótar fyrir rekstur sveitarfélagsins og mannlíf í bænum,“ segir Rósa.
Fjárfestingar á árinu 2020 námu 3,4 milljörðum króna
Í tilkynningunni kemur enn fremur fram að hagnaður vegna sölu á hlutnum í HS Veitum hafi numið 2,6 milljörðum eftir skatta og að tekjufærsla af lóðasölu numið 1,4 milljörðum.
Á móti kemur að gjaldfærsla lífeyrissjóðsskuldbindingar var 884 milljónum krónum hærri en gert hafði verið ráð fyrir í áætlunum og fjármagnsliðir voru 451 milljón króna hærri. Þá má rekja 420 milljóna króna frávik frá áætlunum í launum og launatengdum gjöldum til uppreiknings á áföllnu orlofi í kjölfar kjarasamninga. Veltufé frá rekstri nam 1,6 milljörðum króna eða 5,2 prósent af heildartekjum.
Skuldaviðmið Hafnarfjarðar hélt áfram að lækka á milli ára. Það var 101 prósent í árslok 2020, miðað við 112 prósent í árslok 2019, og er því vel undir 150 prósenta skuldaviðmiði samkvæmt reglugerð um fjárhagsleg viðmið og eftirlit með fjármálum sveitarfélaga. Ný lán námu 3,8 milljörðum króna en á móti námu greiðslur langtímaskulda alls um 3,2 milljörðum króna.
Fjárfestingar á árinu 2020 námu 3,4 milljörðum króna. Heildareignir í lok árs námu samtals 67 milljörðum króna og jukust um 7,4 milljarða króna á milli ára. Heildarskuldir og skuldbindingar námu samtals 50 milljörðum króna og hækkuðu um 4,7 milljarða króna á milli ára.
