Samkvæmt tilkynningunni geta viðskiptavinir bankans nú endurfjármagnað íbúðalánin sín, gengið frá skjölunum og bankinn svo þinglýst rafrænt. Ekki sé lengur þörf á að fara til sýslumanns til að þinglýsa. Um sé að ræða stórt og viðamikið verkefni sem markvisst hafi verið unnið að frá árinu 2019 í góðu samstarfi við sýslumannsembættin og fleiri.

Lilja B. Einarsdóttir, bankastjóri Landsbankans, segir: „Áhersla okkar á að bjóða samkeppnishæf kjör og framúrskarandi þjónustu hefur leitt til þess að markaðshlutdeild Landsbankans á íbúðalánamarkaði hefur aukist hratt. Starfsfólk bankans um allt land getur sinnt íbúðalánaráðgjöf og afgreiðslu íbúðalána óháð staðsetningu sem hefur haldið biðtíma í lágmarki. Þrátt fyrir stóraukna eftirspurn hefur okkur því tekist að gera ferlið við íbúðalánatöku og endurfjármögnun einfaldara og fljótlegra. Með rafrænum þinglýsingum íbúðalána styttist biðtími enn frekar og sporin sparast. Okkar markmið er að einfalda viðskiptavinum lífið og rafrænar þinglýsingar íbúðalána gera það svo sannarlega.“