Ráðstöfunartekjur heimilanna jukust árið 2019 um 6,1 prósent frá fyrra ári. Ráðstöfunartekjur á mann jukust um 3,8 prósent á milli ára og kaupmáttur ráðstöfunartekna á mann jókst um 0,7 prósent. Þetta kemur fram í tilkynningu frá Hagstofunni.

Ráðstöfunartekjur heimilanna má skilgreina sem samtölu launatekna, eignatekna, tilfærslutekna, reiknaðs rekstrarafgangs vegna eigin eignarhalds, þar með talið íbúðarhúsnæðis, en að frádregnum eigna- og tilfærsluútgjöldum.

Mynd/Hagstofan

Heildartekjur heimilanna jukust árið 2019 um 6,0 prósent frá fyrra ári. Þar af jukust heildar launatekjur um 4,3 prósent, rekstrarafgangur vegna eigin eignarhalds um 10 prósent og eignatekjur um 6,4 prósent. Heildartilfærslutekjur jukust um 10,7 prósent á milli ára.

Þá jukust heildareigna- og tilfærsluútgjöld um 5,8 prósent en þar af jukust tilfærsluútgjöld um 5,8 prósent og eignaútgjöld um 5,3 prósent.