Guðlaugur Þór Þórðarson, umhverfis-, orku- og loftslagsráðherra, lítur tilkynningu Landsvirkjunar um að mögulega verði dregið úr afhendingu raforku alvarlegum augum. Um leið og ráðuneytið varð þess áskynja voru fulltrúar Landsvirkjunar og Orkustofnunar kallaðar á fund og í kjölfar þess var sett af stað vinna til að bregðast við vandanum.

„Staðan kom mér satt að segja á óvart. Um leið og ég varð þess áskynja hvernig málin stæðu þá leit ég það mjög alvarlegum augum. Fundaði ég þegar í stað með aðilum sem lýst höfðu yfir áhyggjum vegna stöðunnar til skamms tíma og er unnið að lausn málanna. Þá fundaði ég með Orkustofnun vegna stöðunnar en stofnunin sendi í kjölfarið bréf á raforkufyrirtækin eins og fjallað hefur verið um í fjölmiðlum,“ segir hann.

Við­skipta­vinir Lands­virkjunar sem kosið hafa mestan sveigjan­leika í samningum um orku­kaup mega búast við tak­mörkunum á af­hendingu raf­orku. Lands­virkjun segir að vegna þurrka­tíðar hafi staðan í vatns­bú­skap fyrir­tækisins ekki verið verri í sjö ár og er hún sér­stak­lega slæm nú á Þjórs­ár­svæðinu sem er stærsta vinnslu­svæði Lands­virkjunar.

Í byrjun árs skipaði ráðherra starfshóp sem vinnur að grænbók um stöðu og áskoranir í orkumálunum. Grænbókin mun gera grein fyrir orkuþörfinni og stöðunni á flutningskerfinu.

„Þessi mikilvægu verkefni eiga að gera okkur ljóst hver staðan er og hvaða áskorunum við stöndum frammi fyrir. Það verður ekki gert nema með bestu mögulegu upplýsingum,“ segir Guðlaugur Þór.

Ráðherra skipaði einnig starfshóp sem vinna á tillögur að bættu raforkuöryggi hér á landi. „Það er mjög mikilvægt af mörgum ástæðum, en sérstök áhersla er á að tryggja raforkuöryggi fyrir heimilin í landinu,“ segir Guðlaugur Þór.

Á þingmálaskrá vorþings voru sett fram frumvörp um að einfalda tæknilegar uppfærslur og aflaukningar á virkjunum sem þegar eru í rekstri og einföldun á niðurgreiðslukerfi varmadælna en reynslan af þeim hefur skilað sér í orkusparnaði fyrir neytendur og samfélög.