Pósturinn er nú þegar með yfir 100 afgreiðslustaði á landsvísu, bæði póstbox og pósthús, en auk þeirra nýtur heimsendingaþjónustan alltaf nokkurra vinsælda. Helmingur nýju póstboxanna verða á höfuðborgarsvæðinu og helmingur á landsbyggðinni.

„Póstboxin hafa aldrei verið vinsælli en núna, enda þægileg og fljótleg leið til að sækja og senda pakka. Með nýju póstboxunum býður Pósturinn viðskiptavinum sínum upp á þétt net sjálfsafgreiðslustöðva, samtals á um 170 stöðum. Þetta eykur sveigjanleika og hraða þar sem póstboxin eru staðsett í alfaraleið um allt land og flestöll eru þau opin allan sólarhringinn. Viðskiptavinir vilja geta sótt og sent pakka þegar þeim hentar og þar sem þeim hentar og þetta er gott tækifæri til að mæta þörfum þeirra enn betur,“ segir Sigríður Heiðar, forstöðumaður söludeildar Póstsins.

Pósturinn á von á 60 nýjum póstboxum til landsins.

Viðskiptavinir geta auðveldlega stjórnað því hvar þeir fá pakka afhenta t.d. í appi Póstsins eða á Mínum síðum á posturinn.is. Nú er verið að velja nýju póstboxunum staði með tilliti til magns og eftirspurnar.

„Viðskiptavinir eru duglegir að láta okkur vita hvar þeir vilja fá póstbox og við tökum tillit til óska þeirra. Við styðjumst einnig við gögn úr starfseminni við val á stöðum sem henta viðskiptavinum okkar best og við erum óhrædd að breyta til ef þarfirnar breytast. Við viljum reyna að komast enn nær viðskiptavininum svo það sé alltaf stutt í næsta afhendingarstað. Pósturinn sker sig frá öðrum dreifingarfyrirtækjum í því hversu víðtækt dreifingarkerfið okkar er. Við berum út pakka og bréf til allra heimila og fyrirtækja landsins,“ segir Sigríður.