Flugfélagið PLAY hefur nú fengið flugrekstrarleyfi frá Samgöngustofu og er undirbúningur fyrir fyrsta flugi félagsins í fullum gangi. Fyrsta vél félagsins, TF-AEW, var afhent í Texas í Bandaríkjunum í gær en vélin er fyrst þriggja systurvéla sem félagið hefur tryggt sér frá flugvélaleigusalanum AerCap.

„Undanfarnar vikur hefur flugvirki á vegum PLAY verið í Houston til að undirbúa vélina til afhendingar fyrir okkur en í vikunni bættust í hópinn fleiri flugvirkjar, áhöfn og fulltrúar Samgöngustofu til að taka vélina út fyrir íslenska skráningu sem lauk svo seint í gærkvöldi, á íslenskum tíma, með flugrekstrarleyfi frá Samgöngustofu,“ segir í tilkynningu um málið.

Andri Geir Eyjólfsson, forstöðumaður tæknideildar PLAY, tók við vélinni ásamt flugstjórunum Halldóri Guðfinnssyni og Friðriki Ottesen og fer vélin nú í skýli þar sem hún verður máluð í einkennislitum PLAY. Að því loknu kemur hún síðan til landsins til að hefja flug á fyrstu áfangastaði félagsins. Hinar tvær vélarnar eru í skráningu og koma til landsins á næstu vikum.

Starfsfólk unnið þrekvirki

Birgir Jónsson, forstjóri PLAY, segir í tilkynningunni að ótrúlegur andi sé nú innan félagsins og þakkar starfsfólkinu sem hefur staðið að verkefninu undanfarin tvö ár. „Við erum með frábært starfsfólk sem hefur unnið þrekvirki við fordæmalausar aðstæður þar sem unnið er af fagmennsku, gleði og virðingu.“

„Fyrir tilvonandi viðskiptavini PLAY vil ég segja þetta, það er mikil tilhlökkun hjá okkur öllum að taka á móti ykkur um borð í nýlegar og hagkvæmar flugvélar okkar. Við ætlum að bjóða samkeppnishæf verð og einfalt ferðalag en þannig verðum við nauðsynleg viðbót við íslenskan flugmarkað“ segir Birgir.

Andri Geir Eyjólfsson, forstöðumaður tæknideildar PLAY, tók við vélinni ásamt flugstjórunum Halldóri Guðfinnssyni og Friðriki Ottesen.