Félagið Orka Holding, sem er meðal annars í eigu Leifs Haraldssonar, hefur fest kaup á öllum hlutabréfum í Kredia Group, eftir því sem fram kemur í fréttatilkynningu.

Leifur, sem er forsvarsmaður Orku Holding og hefur komið að stofnun fjölmargra fjártæknifyrirtækja hérlendis og erlendis undanfarin ár, segir félagið ætla að byggja upp annars konar viðskiptamódel en Kredia hafi starfað eftir.

„Orka Holding stefnir á útgáfu alþjóðlegra greiðslukorta með betri virkni og minni tilkostnaði en aðrir útgefendur korta almennt bjóða. Orka mun starfa í fjórum löndum til að byrja með en ætlunin er að bjóða þjónustu fyrirtækisins um alla Evrópu,“ segir í tilkynningunni.

Haft er eftir Leifi að hér á landi muni Orka Holding starfa undir vörumerkinu NúNú og „bjóða upp á hagkvæma fjármögnun á sanngjarnan, einfaldan og þægilegan hátt. Fljótlega verður hægt að skrá sig fyrir kortum og munum við hefja afhendingar í júní," segir Leifur um fyrirætlanir félagsins á íslenskum markaði.

Til þess að styðja við hraðari viðskiptaþróun NúNú og Orka hefur Orka Holding fest kaup á öllum hlutabréfum Kredia Group Ltd.

,,Ég var einn af stofnendum Kredia á sínum tíma en sagði skilið við félagið í árslok 2013,“ nefnir Leifur.

„Ég þekki því ágætlega til fyrirtækisins en við ætlum að byggja á öðru viðskiptamódeli. Undanfarin ár hefur viðskiptamótel Kredia Group verið á skjön við flest okkar samfélagslegu gildi. Hins vegar er viðskiptavinahópur Kredia Group mjög stór og hefur töluverða reynslu af því að nýta sér fjártækni í skammtímafjármögnun. Það er áhugavert fyrir fyrirtæki eins og Orka og NúNú sem einblína á fjártækni og smellpassar því fyrir plön okkar um útgáfu kreditkorta og einfalda og þægilega fjártækniþjónustu fyrir einstaklinga.

Við munum ekki bjóða smálán heldur stunda samkeppni við fjármálastofnanir landsins með betri lausnum sem bjóða upp á meiri einfaldleika og þægindi fyrir viðskiptavini. Þetta gefur okkur tækifæri að byggja upp gott langtímasamband við okkar viðskiptavini.

Við höfum lengi verið að undirbúa evrópskt fjártæknifyrirtæki sem auðveldar fólki lífið með til dæmis rafrænum kortum sem bjóða upp á fjölda gjaldmiðla og minni tilkostnaði, allt niður í frí kortagjöld. Einnig stefnum við á útgáfu alþjóðlegra greiðslukorta með betri virkni og minni tilkostnaði en bankarnir almennt bjóða,“ bætir Leifur við um kaupin.