Opnuð hefur verið gestastofa í Grænu smiðju ORF Líftækni í Grindavík. Græna smiðjan er vistvænt 2000 fermetra hátækni gróðurhús sem nýtir jarðvarma, íslenskan vikur og hreint, íslenskt vatn til þess að rækta byggplöntur, en hún getur hýst allt að 130 þúsund byggplöntur á sama tíma.

Í fréttatilkynningu um málið kemur fram að ORF Líftækni hafi þróað tækni til að framleiða sérvirk prótein í byggi, en aðferðin er afrakstur áratuga vísinda- og þróunarstarfs. Prótein þessi eru notuð sem innihaldsefni í BIOEFFECT húðvörur fyrirtækisins, seld til læknisfræðilegra rannsókna og nýtt í önnur þróunarverkefni fyrirtækisins.

„Gestastofan mun styðja enn frekar undir landkynningaráhrif BIOEFFECT en þar verður boðið upp á skipulagðar skoðunarferðir um gróðurhúsið ásamt kynningu á því hvernig EGF verður til og á sögu BIOEFFECT,“ segir í tilkynningunni.

Þá er haft eftir Frosta Ólafssyni, forstjóra ORF Líftækni, að með gestastofunni verði nýr valkostur fyrir ferðamenn og aðra á svæðinu, bæði til þess að kynna sér vistvænt gróðurhús sem nýtir jarðvarma til framleiðslu og afrakstur íslensks hugvits og nýsköpunar.

ORF 1.jpg

Gestastofan var formlega opnuð af Þórdísi Kolbrúnu Reykfjörð Gylfadóttur, ferðamála-, iðnaðar- og nýsköpunarráðherra, í gær að viðstöddu fjölmenni.

BIOEFFECT húðvörulínan fagnar tíu ára afmæli á næsta ári. Vörurnar fást nú í leiðandi verslunum, flugfélögum, heilsulindum og vefverslunum um allan heim. Vörurnar innihalda EGF (Epidermal Growth Factor) sem er einn mikilvægasti frumuvaki húðarinnar og hvetur til framleiðslu á kollageni og elastíni.