Bandaríski vogunarsjóðurinn Och-Ziff Capital, sem hefur verið einn af stærstu hluthöfum Arion banka frá árinu 2017, minnkaði hlut sinn í bankanum fyrr í dag sem nemur um 1,5 prósentum þegar hann seldi bréf fyrir jafnvirði rúmlega 2,3 milljarða króna, samkvæmt heimildum Markaðarins.

Þetta er í annað sinn í þessum mánuði sem Och-Ziff stendur að sölu á stórum hlut í Arion banka. Sjóðurinn, sem er núna fjórði stærsti hluthafi bankans með rúmlega sex prósenta hlut, hefur á aðeins tveggja vikna tímabili losað um liðlega 3,8 prósenta hlut í Arion fyrir samanlagt nærri sex milljarða króna.

Tilkynnt var um viðskipti upp á 25,76 milljónir hluta að nafnverði í Arion banka í Kauphöllinni í morgun á genginu 90 krónur á hlut. Samkvæmt heimildum Markaðarins voru kaupendur að bréfunum breiður hópur fagfjárfesta.

Och-Ziff Capital kom inn í hluthafahóp Arion banka vorið 2017 þegar sjóðurinn, ásamt tveimur öðrum erlendum vogunarsjóðum og fjárfestingabankanum Goldman Sachs, keypti samtals nærri 30 prósenta hlut í bankanum af eignarhaldsfélaginu Kaupþingi fyrir um 49 milljarða króna.

Sjóðurinn heldur á bréfunum í gegnum félagið Sculptor Capital Management.

Auk Och-Ziff hafa aðrir erlendir fjárfestar, meðal annars Goldman og Lansdowne, hafa minnkað mikið við hlut sinn í Arion banka á sama tíma og íslenskir lífeyrissjóðir, eins og LSR, Gildi og Lífeyrissjóður verslunarmanna, hafa bætt verulega við eignarhlut sinn í bankanum.

Samanlagður eignarhlutur lífeyrissjóða á opinberum lista yfir stærstu hluthafa bankans nemur orðið um 35 prósentum.

Fyrir söluna í dag var Gildi annar stærsti hluthafi Arion banka með 9,92 prósenta hlut á meðan Lífeyrissjóður verslunarmanna var skráður fyrir tæplega 7,5 prósetna hlut. Langsamlega stærsti hluthafinn er eftir sem áður bandaríski vogunarsjóðurinn Taconic Capital með rúmlega 23,2 prósenta hlut.

Hlutabréfaverð bankans, sem fór lægst í 51 krónu á hlut þann 24. mars síðastliðinn, hefur hækkað mikið á undanförnum mánuðum og stóð nú í 91,5 krónum á hlut við lokun markaða í dag. Hlutabréfaverð félagsins lækkaði um 1,7 prósent í um 3.150 milljóna króna veltu.