Nýtt millibankagreiðslukerfi verður tekið í notkun hér á landi næstkomandi föstudag. Stór hluti allra fjármálafærslna einstaklinga og fyrirtækja í landinu, meðal annars með debetkortum og almennum millifærslum á milli reikninga, fer um kerfið sem þjónustar banka og fjármálastofnanir.

Þetta kemur fram í frétt á vef Seðlabanka Íslands en nýja kerfið, sem er í eigu bankans, tekur við hlutverki svokallaðs stórgreiðslukerfis Seðlabankans og jöfnunarkerfis Greiðsluveitunnar sem jafnframt er í eigu bankans.

Á síðasta ári var veltan í stórgreiðslukerfinu 17 þúsund milljarðar króna í um 118 þúsund greiðslufyrirmælum. Í jöfnunarkerfinu var veltan rúmlega fjögur þúsund milljarðar króna og færslufjöldinn ríflega 68 milljónir.

Fram kemur í frétt Seðlabankans að hlutverk hins nýja millibankagreiðslukerfis verði annars vegar að gera upp stórgreiðslur, þ.e. greiðslur sem nema 10 milljónum króna eða hærri fjárhæðum, í rauntíma á stórgreiðslureikningum bankastofnana í Seðlabankanum og hins vegar að jafna smágreiðslur, þ.e. greiðslur undir 10 milljónum króna, á milli bankastofnana. Jöfnunarfjárhæðir úr þessum viðskiptum séu svo gerðar upp á stórgreiðslureikningum tvisvar á sólarhring á virkum dögum.

Nýja millibankagreiðslukerfið hefur verið í undirbúningi frá árinu 2015. Gerð þess var boðin út og hlaut suður-afríska fyrirtækið Perago verkið. Perago er dótturfélag SIA, sem er ítalskt félag. Bæði fyrirtækin hafa tekið þátt í uppbyggingu hliðstæðra kerfa í norrænum seðlabönkum. Hefur verkefnið verið unnið í nánu samstarfi við Reiknistofu bankanna, viðskiptabankana og sparisjóði landsins.

Ástæða endurnýjunarinnar er sögð vera sú að gömlu kerfin séu komin til ára sinna og þörfnuðust endurnýjunar, líkt og átt hefur við um fleiri þætti sem tengjast greiðslumiðlun í bankakerfinu hér á landi. Markmiðið með hinu nýja kerfi er að áfram verði hægt að miðla greiðslum hér á landi á skjótan, öruggan og hagkvæman hátt.