Stofnendur Jörth eru hjónin Birna G. Ásbjörnsdóttir, sem nú er að ljúka doktorsnámi í heilbrigðisvísindum við Háskóla Íslands, og Guðmundur Ármann, umhverfis- og rekstrarfræðingur. Birna hefur í tæpa tvo áratugi byggt upp mikla sérþekkingu á meltingarveginum og tengslum hans við heilsu, bæði andlegri og líkamlegri. Hún hefur helgað líf sitt rannsóknum og námi í heilbrigðisvísindum bæði hérlendis og erlendis, með áherslu á þarmaflóruna og áhrif hennar á heilsu.

„Vísindin eru stöðugt að leiða betur í ljós mikilvægi þarmaflórunnar fyrir andlega og líkamlega heilsu okkar. Ég vil nýta reynslu mína sem rannsakandi, fyrirlesari og ráðgjafi til að styðja fólk í vegferð að bættri heilsu og í þeirri stöðugu vegferð að viðhalda góðri heilsu. Þetta er ástæða þess að ég ákvað að stofna Jörth,“ segir Birna.

Fyrsta varan sem Jörth setur á markað

Abdom 1.0 er fyrsta varan sem Jörth setur á markað. Abdom 1.0 er háþróað bætiefni sem eflir þarmaflóruna og hefur græðandi áhrif á meltingarveginn. Bætiefnið samanstendur af sérhannaðri blöndu meltingargerla sem Jörth hefur þróað á grunni vísinda og rannsókna. Blandan samanstendur af 19 tegundum mikróhjúpupraðra góðgerla og er í styrkleika sem er með þeim hæsta sem finnst á markaði í dag.

Grunninnhald Abdom 1.0 á móti meltingargerlum er íslensk broddmjólk sem hefur verið gerjuð og frostþurrkuð. Segja má að broddmjólk sé hin sanna ofurfæða enda stútfull af efnum sem hafa verndandi áhrif á meltingarveginn. Með tilkomu Abdom 1.0 er í fyrsta skipti komin vara á almennan neytendamarkað sem inniheldur íslenska broddmjólk.

Abdom 1.0 inniheldur aðeins náttúruleg hráefni og er án fylli- og aukaefna. Við þróun vörunnar naut Jörth stuðnings og ráðgjafar vísindateymis sem samanstendur af virtum sérfræðingum bæði íslenskum og erlendum.