Íslenska gleraugnaverslunin Eyesland mun opna verslun í flugstöðinni á Keflavíkurflugvelli snemma á næsta ári. Opnað var fyrir útboð fyrir gleraugnaverslun fyrr á þessu ári og af þeim tveimur fyrirtækjum sem sendu inn gögn þá átti Eyesland hagkvæmasta tilboðið.

Við mat á tilboðunum var horft til tveggja meginþátta, tæknilegs og fjárhagslegs. Í tilkynningu frá Isavia segir að sérfræðiteymi hafi verið á bak við hvorn matsflokk en meðal þess sem hafði áhrif á matið var vöruúrval, gæði, þjónusta og verð, hönnun, sjálfbærni og markaðssetning.

Sigrún Andersen er framkvæmdastjóri Provision ehf., sem rekur Eyesland gleraugnaverslanir og Provision heildsölu. Hún segir að síðan fyrirtækið var stofnað árið 2010 hafi það vaxið og dafnað og eru þau hjá fyrirtækinu gífurlega spennt fyrir komandi tímum í nýju verkefni.

„Við höfum ávallt lagt áherslu á faglega og persónulega þjónustu og munum halda því áfram í nýrri verslun okkar á Keflavíkurflugvelli. Við hlökkum til að taka þátt í þeirri uppbyggingu sem á sér stað á vellinum,“ segir Sigrún.

„Við höfum að leiðarljósi að útboðsferlið sé gagnsætt og úrvinnslan skýr."

Gunnhildur Erla Vilbergsdóttir, deildarstjóri verslunar og veitinga hjá Isavia, býður Eyesland velkomin í flugstöðina og þakkar á sama tíma Optical Studio fyrir gott samstarf til fjölda ára. Hún segir að Optical Studio hafi verið brautryðjendur á þessum markaði í flugstöðinni og hafi eins veitt góða þjónustu í gegnum tíðina.

„Lögum samkvæmt, bjóðum við út verslunar- og veitingarými flugstöðvarinnar. Við höfum að leiðarljósi að útboðsferlið sé gagnsætt og úrvinnslan skýr. Enda okkar markmið að allir bjóðendur hafi jafna möguleika á að vinna útboðin, hvort sem þeir eru vanir útboðunum eða ekki,“ segir Gunnhildur.