Niceair hefur ákveðið að bæta við flugi til Kaupmannahafnar og mun félagið fljúga þrisvar í viku til höfuðborgar Danmerkur frá og með 1. júní næstkomandi.
Þetta kemur fram í tilkynningu frá félaginu en til þessa hefur félagið flogið þangað tvisvar í viku, á fimmtudögum og sunnudag. Nú hyggst félagið bæta við þriðju ferðinni sem farin verður á þriðjudögum.
„Það hefur sýnt sig að Kaupmannahöfn er afar vinsæll áfangastaður Íslendinga og vaxandi fjöldi notar Kastrup sem tengiflugvöll um alla Evrópu. Frá Kaupmannahöfn er flogið til meira en 200 áfangastaða um allan heim og þetta nýtir nú þegar um þriðjungur farþega okkar,“ segir Helgi Eysteinsson, framkvæmdastjóri sölu- og markaðsmála Niceair, í tilkynningu félagsins.
Helgi bendir enn fremur á að flogið sé á morgnana klukkan 07:45 og getur farþegum gefist góður tími á Kastrup áður en flogið er lengra síðdegis.
„Hér munar auðvitað mestu um að farþegar okkar eru nú að komast á lokaáfangastað innan eins dags, í stað þess að leggja land undir fót á Íslandi og gista til næsta dags til að taka flugið. Gamli höfuðstaðurinn er síðan ekki síst vinsæll sem frábær helgarferðastaður” segir Helgi.
