Tilkynnt var um hið nýja flugfélag 17. febrúar síðastliðinn, en það mun einbeita sér að því að fljúga með erlenda ferðamenn frá Bretlandi og Danmörku til Akureyrar ásamt því að þjónusta heimamarkaðinn með vikulegu flugi til Tenerife.

„Það er mikil bylting fyrir heimamarkaðinn að geta bókað sig til hundruð áfangastaða erlendis í gegnum tengivelli félagsins í Stansted og Kastrup, auk þess sem Akureyrarflugvöllur verður nú bókanlegur með beinu flugi utan úr heimi í fyrsta sinn. Akureyri er nýr áfangastaður í áætlunarflugi á Íslandi og því spennandi kostur fyrir ferðamenn, ekki síst endurkomufarþega sem hafa heimsótt höfuðborgarsvæðið og Suðurlandið í fyrri heimsóknum en vilja nú upplifa meira.

Við væntum mikils af því að útvíkka þennan möguleika enn frekar í samstarfi við Dohop og þeirra samstarfsaðila meðal erlendra flugfélaga, þannig að bókunar-og leitarferli fyrir okkar farþega verði enn einfaldara,“ segir Þorvaldur Lúðvík Sigurjónsson, framkvæmdastjóri Niceair.

Dohop hefur þróað hugbúnað og tengimöguleika fyrir flugfélög og ferðaþjónustu í 18 ár. Nýjasta afurð félagsins er Dohop Connect sem býður flugfélögum upp á að selja tengiflug með fjölmörgum flugfélögum til hundruð áfangastaða um allan heim.

Davíð Gunnarsson, framkvæmdastjóri Dohop: „Það er ánægjulegt að nýjasta flugfélagið skuli velja okkur til að þróa með sér lausnir fyrir sína farþega sem ferðast um Akureyrarflugvöll. Tengimöguleikar út frá Akureyri eru fjölmargir og verða með lausn Dohop enn aðgengilegri fyrir heimamarkaðinn. Dohop Connect lausnin er hentug fyrir lítil félög eins og Niceair, en með aðild að því útvíkkar félagið leiðakerfi sitt á einfaldan hátt.“