Nettó hefur nú opnað sjö nýjar afhendingarstöðvar netverslunar víðs vegar um landið. Til stendur að fjölga stöðvunum enn frekar á komandi misserum og er stefnt að því að bjóða upp á þjónustuna í öllum sautján verslunum Nettó fyrir árslok.

Afhendingastöðvarnar sjö eru staðsettar í Lágmúlanum, Krossmóa Reykjanesbæ, á Akureyri, Selfossi, Hafnarfirði, Búðakór og Grindavík. Nettó hafði þegar opnað tvær slíkar stöðvar árið 2017 og eru þær því alls orðnar níu.

„Krafan um tímasparnað, samhliða hefðbundnum sparnaði þegar kemur að matarinnkaupum, er orðin sífellt meira aðkallandi. Við höfum frá fyrsta degi séð fyrir okkur að geta mætt þeim kröfum og höfum lagt mikla vinnu í að þróa og bæta kerfið svo það sé hægt,“ segir framkvæmdastjóri verslunarsviðs Samkaupa, Gunnar Egill Sigurðsson.

Gunnar Egill Sigurðsson, framkvæmdastjóri verslunarsviðs Samkaupa

„Við erum því afar ánægð og stolt yfir að vera komin á þann stað núna að geta boði viðskiptavinum víðs vegar um landið, en ekki aðeins á höfuðborgarsvæðinu, upp á að nýta sér þjónustuna. Með því að opna á fleiri stöðum ætlum við okkur að bæta þjónustu okkar enn frekar, en við höfum kappkostað við að vera fremst í fararbroddi þegar kemur að matvöru á lágvöruverði á netinu og þetta er liður í því,“ segir Gunnar Egill að lokum.