Í samstarfi við yfirvöld og heilbrigðiskerfið þróaði Origo stafrænar tæknilausnir í Covid-19 faraldrinum fyrir bólusetningar, sýnatökur, rafræn vottorð og skimun á landamærum.
Origo segir að með notkun Heilsuveru var einfaldara fyrir einstaklinga að panta tíma í skimun og aukinn tímasparnaður fólginn í því fyrir bæði einstaklinga og heilbrigðisstarfsfólk. Mesti ávinningurinn af notkun lausnanna var þó fólgin í því að niðurstöður um smit bárust fyrr til einstaklinga og þeir sem ekki reyndust smitaður gátu sloppið fyrr úr sóttkví.
Fyrirtækið segir einnig að stærsti ábatinn af stafrænum tæknilausnum í faraldrinum, var að með því að fá niðurstöður úr skimun gegnum Heilsuveru með mun hraðari hætti en ella, gátu einstaklingar sem ekki voru smitaðir í sóttkví snúið aftur til vinnu.
Hagfræðistofnun mat að líklegast væri ábatinn af notkun Heilsuveru mjög vanmetinn en heildarsparnaðurinn að frádregnum kostnaði var 8,7 milljarðar króna. Margt var ekki tekið með í útreikningana, til dæmis sýnatökukerfið á landamærunum og vottorðin sem hægt var að sækja sjálfvirkt gegnum Heilsuveru.
,,Tækifærin eru endalaus innan heilbrigðistækni og skýrsla Hagfræðistofnunar ýtir undir mikilvægi þess að styðja við frekari þróun á heilbrigðistækni sem mun óhjákvæmilega ýta undir mikinn sparnað bæði fyrir heilbrigðisstarfsfólk en einnig almenning. Heilbrigðislausnir Origo þróa fjölbreyttar lausnir fyrir íslenskt heilbrigðiskerfi. Allar þær lausnir sem við þróum eru með það í huga að styðja við störf heilbrigðisstarfsfólks og auka öryggi og gæði í þeirri heilbrigðisþjónustu sem er veitt," segir Arna Harðardóttir, sölu- og markaðsstjóri heilbrigðislausna.
