Viðskipti með hlutabréf í Kauphöllinni hafa numið 2,2 milljörðum króna það sem af er degi. Allar verðbreytingar verið upp á við en alls hafa fimmtán félög hækkað í verð og þrjú staðið í stað.

Hækkun úrvalsvísitölunnar stendur nú í 1,96 prósentum. Hagar hafa hækkað mest, eða um 5,34 prósent í 349 milljóna króna viðskiptum en Samkeppniseftirlitið samþykkti í gær yfirtöku verslunarrisans á Olís. 

Síðan kemur Icelandair sem hefur hækkað um 4,14 prósent í 417 milljóna króna viðskiptum en sem stendur er mest velta með bréf í flugfélaginu. 

Þá hefur Reginn hækkað um 2,53 prósent og Eik um 3,14 prósent. Engar verðbreytingar hafa orðið á hlutabréfum í Origo, Sjóvá og Tryggingamiðstöðinni.