Komustundvísi hjá Icelandair var 90 prósent í nóvember samanborið við 75,7 prósent á sama tíma í fyrra og farþegum til Íslands heldur áfram að fjölga. Þetta kemur fram í flutningatölum fyrir nóvembermánuð sem Icelandair Group birti í Kauphöll í dag.

Þetta er besti árangur félagsins í áratug þegar kemur að stundvísi en á þessum tíma, eða frá árinu 2009, hefur farþegafjöldi Icelandair tvöfaldast og fjöldi véla í flotanum rúmlega þrefaldast. Farþegum Icelandair til Íslands hélt áfram að fjölga í nóvember og voru þeir rúmlega 114 þúsund talsins, sem er 16 prósenta aukning á milli ára. Það sem af er ári hefur Icelandair flutt um 1,7 milljón farþega til Íslands, sem er 25 prósenta aukning frá árinu 2018.

Farþegum frá Íslandi fjölgaði einnig í nóvember miðað við sama tíma í fyrra, eða um 9 prósent, og hefur fjölgað um 19 prósent það sem af er ári. Tengifarþegum fækkaði í nóvember um 29 prósent en fækkun þeirra er 9 prósent það sem af er ári. Sætanýting í millilandastarfsemi var 78,6 prósent samanborið við 79,8 prósent á sama tíma í fyrra. Heildarfarþegafjöldi Icelandair fyrstu 11 mánuði ársins var rúmlega 4,1 milljón og hefur farþegafjöldinn aukist um 7 prósent á milli ára.

„Stundvísi er einn mikilvægasti þáttur í starfsemi flugfélaga og hefur víðtæk áhrif, ekki síst á upplifun og ánægju farþega. Áhrifin koma jafnframt víða fram í starfseminni, svo sem á ýmsa kostnaðarliði, vinnuálag og þar með starfsánægju. Það þarf margt að ganga upp til að árangur náist en við höfum bætt stundvísi félagsins umtalsvert á undanförnum mánuðum með samstilltu átaki starfsmanna, þrátt fyrir álag og breytingar á leiðakerfinu vegna kyrrsetningar MAX vélanna,“ segir Bogi Nils Bogason, forstjóri Icelandair Group.

Við munum áfram leggja áherslu á markaðina til og frá Íslandi í vetur og á næsta ári. Sveigjanleiki í leiðakerfi félagsins gerir okkur kleift að færa tíðni á milli áfangastaða til að mæta eftirspurn, auka hagkvæmni og halda áfram að styrkja starfsemi félagsins.“