Á vef Hagstofunnar kemur fram að meiri velta var í flestum atvinnugreinum árið 2021 en 2020 samkvæmt virðisaukaskattskýrslum. Árið 2020 var mikið um lokanir og takmarkanir vegna kórónuveirufaraldursins og því er athyglisvert að bera saman veltu 2021 og veltu 2019, fyrir faraldurinn.

Sé velta á árinu 2021 borin saman við veltu 2019 var aukning í öllum framleiðslugreinum. Einnig jókst velta í heild- og smásölu að undanskilinni olíuverslun. Velta dróst hins vegar verulega saman í nokkrum greinum þjónustu, til dæmis í rekstri ferðaskrifstofa og gististaða.

Ársmeðaltal gengisvísitölu hækkaði um 8,4 prósent frá 2019 til 2021. Ársmeðaltal vísitölu neysluverðs hækkaði um 7,4 prósent á sama tímabili.

Endurskoðun hagtalna

Tölur um veltu samkvæmt virðisaukaskattskýrslum eru bráðabirgðatölur. Við birtingu fréttar 20. desember síðastliðinn var velta í virðisaukaskattskyldri starfsemi, að frátalinni lyfjaframleiðslu, talin vera 936,3 milljarðar króna í september-október 2021 sem var 22,95 prósenta hækkun frá sama tímabili árið 2020. Nú hafa nýrri tölur borist og velta á þessu tímabili er talin vera 937,4 milljarðar sem er 23,09 prósent hækkun á milli ára.