Hugbúnaðarfyrirtækið Klappir, sem skráð er á First North-hliðarmarkað Kauphallarinnar, hefur ráðið Matthildi Fríðu Gunnarsdóttur og Benedikt D Valdez Stefánsson í þróunarteymi félagsins. Þetta kemur fram í tilkynningu.

Klappir hafa undanfarin fimm ár þróað stafrænar lausnir á sviði umhverfismála sem lágmarka vistspor fyrirtækja.

Matthildur hefur starfað sem dæmatímakennari í gagnasafnsfræði, greiningu og hönnun hjá Háskólanum í Reykjavík. Hún starfaði einnig áður hjá Reiknistofa bankanna í viðhaldi og skjölun á vefþjónustum. Hún mun útskrifast sem BSc úr hugbúnaðarverkfræði frá HR í vor.

Benedikt starfaði áður hjá Össur við samþættingu á vefum þeirra, en þar áður hjá m.a. hugbúnaðarfyrirtækjunum Aranja og Kolibri við þróun stafrænna lausna og vefhönnun.

Notendum fjölgaði um 72 prósenet á milli ára

Klappir hafa vaxið jafnt og þétt á síðastliðnu einu og hálfu ári. Á síðasta ári fjölgaði notendum hugbúnaðarins um 72 prósent. Klappir eru nú með yfir 300 íslenska hlutahafa, og rúmlega fjögur þúsund notendur í yfir 20 löndum nýta lausnir félagsins. Klappir voru skráðar á First North markað Nasdaq á Íslandi árið 2017.

„Íslensk fyrirtæki, sveitafélög og stofnanir eru að auka mjög nýtingu á stafræna lausnarpallinum okkar. Með hugbúnaðinum geta fyrirtæki og stofnanir lágmarkað vistspor sitt og rekstrarkostnað í leiðinni. Auk þess geta þau dregið úr áhættu með að tryggja fylgni við umhverfislöggjöf hverju sinni og sýnt fram á árangurinn með því að nota stafræna tækni til að halda grænt bókhald. Við munum áfram leggja áherslu á að styrkja innviði félagsins, efla markaðssetningu og dreifingu á lausnum félagsins bæði hér heima sem og á alþjóðamörkuðum,“ segir Jón Ágúst Þorsteinsson, forstjóri Klappa.