Marel hefur náð samkomulagi við eigendur um 90 prósent hlutafjár hátæknifyrirtækisins Völku um kaup á félaginu. Marel stefnir að því að kaupa allt hlutafé, en þetta kemur fram í tilkynningu. Kaupin eruð háð hefðbundnum fyrirvörum, þar með töldum fyrirvara um samþykki samkeppnisyfirvalda. Áætlað er að gengið verði frá kaupunum síðar á árinu.

Kaupverðið er greitt 50 prósent með reiðufé og 50 prósent í Marel hlutabréfum, fyrir utan minni hluthafa sem býðst greiðsla með reiðufé að fullu. Seljendur sem fá hlutabréf í Marel skuldbinda sig að eiga þau í 18 mánuði frá kaupunum. Kaupverð er ekki gefið upp í fréttatilkynningu vegna málsins.

Valka er hátæknifyrirtæki sem framleiðir fiskvinnslulausnir fyrir hvítfisk og lax. Helgi Hjálmarsson stofnaði fyrirtækið árið 2003 og hefur síðan þá kynnt til sögunnar fjölmargar nýstárlegar fiskvinnslulausnir sem hefur verið vel tekið af markaðsaðilum. Vöruframboð félagsins inniheldur meðal annars vatnsskurðarvélar, snyrti- og flokkunarlínur. Valka er með um 17 milljónir evra í árstekjur, en hjá félaginu starfa samtals 105 starfsmenn á Íslandi og í Noregi.

„Stofnun Völku árið 2003 var stórt skref fyrir mig eftir níu frábær ár í Marel þar sem ég vann að mörgum spennandi nýsköpunarverkefnum. Það mætti segja að með sameiningu Marel og Völku séum við komin aftur heim, en fyrirtækin deila sömu sýn og ástríðu fyrir að þróa hátækni vinnslulausnir sem gjörbylta því hvernig fiskur er unninn á sjálfbæran hátt.

Sameinað vöruframboð okkar verður sterkur grunnur til að búa til enn betri heildarlausnir sem ég hlakka til að kynna fyrir okkar núverandi og framtíðarviðskiptavinum, sem við getum nú þjónustað betur með víðtæku sölu- og þjónustuneti Marel.

Ég er virkilega spenntur að yfirfæra tækni Völku yfir í aðra iðnaði þar sem við sjáum mikil tækifæri. Ég er viss um að með sameinuðu félagi sé búið að leggja grunn að vinningsliði sem er vel í stakk búið til að ná eftirtektarverðum árangri á alþjóðavísu,“ er haft eftir Helga Hjálmarssyni, stofnandi og framkvæmdastjóra Völku sem tekur nú við stöðu framkvæmdastjóra vinnslulausna hjá Marel.

„Við erum spennt fyrir því að sameinast Völku, framleiðanda hátækni fiskvinnslulausna. Valka er mjög sterkt tæknilega og hefur góða innsýn í þarfir viðskiptavina í sjávarútvegi.

Saman munu fyrirtækin byggja á því besta frá báðum, auka stærðarhagkvæmni, hraða vöruþróun og styrkja sameinað vöruframboð til þess að geta boðið viðskiptavinum framúrskarandi lausnir á þessum vaxandi markaði,“ segir Guðbjörg Heiða Guðmundsdóttir, framkvæmdastjóri fiskiðnaðar Marel.