Máni Atlason hefur verið ráðinn framkvæmdastjóri GAMMA, dótturfélags Kviku banka, og kemur hann í stað Valdimars Ármanns sem hefur látið af störfum sem forstjóri félagsins.

Þetta kemur fram í fréttatilkynningu frá Kviku banka sem eignaðist GAMMA Capital Management í mars á þessu ári og hefur félagið verið dótturfélag bankans síðan þá. Á undanförnum mánuðum hefur verið unnið að endurskipulagningu á eignastýringarstarfsemi Kviku og bankinn tilkynnti þann 2. september sl. að sameina ætti eigna- og sjóðastýringastarfsemi samstæðunnar í einu dótturfélagi.

Næstu skref við endurskipulagningu eignastýringarstarfsemi samstæðunnar verða að færa starfsemi eignastýringar Kviku inn í Júpíter rekstrarfélag, dótturfélag bankans. Í kjölfarið er stefnt að því að sameina starfsemi GAMMA og Júpíters.

Máni hefur lokið BA og MA prófi í lögfræði frá Háskólanum í Reykjavík og hefur starfað á lögfræðisviði Kviku frá árinu 2015, auk þess að vera lögmaður og ritari stjórnar Júpíters. Áður starfaði Máni hjá LOGOS lögmannsþjónustu í Reykjavík og London. Hann er með lögmannsréttindi og hefur lokið prófi í verðbréfaviðskiptum.

Þá kemur fram í fréttatilkynningunni að staða tveggja fagfjárfestasjóða í rekstri GAMMA, þ.e. GAMMA: Novus og GAMMA: Anglia, sé umtalsvert verri en gert hafði verið ráð fyrir. Hefur skráð gengi þeirra verið lækkað sem því nemur. Lækkun á gengi sjóðanna hefur ekki áhrif á áætlaða afkomu Kviku á árinu 2019. Afkomuspá Kviku var hækkuð í annað sinn á árinu samhliða birtingu hálfsársuppgjörs og er áætlað að afkoma á árinu 2019 verði 2.900 milljónir króna fyrir skatta.