Makalausi dagurinn (e. Singles Day), sem varð alþjóðlegt fyrirbæri fyrir tilstilli kínverska verslunarrisans Alibaba, er orðinn alstærsti dagur ársins í netverslun og markar hann nú upphaf jólavertíðar Póstsins. Þetta kemur fram í tilkynningu.

Framundan eru svartur föstudagur (e. Black Friday) sem ber upp á 26. nóvember í ár og stafrænn mánudagur (e. Cyber Monday) þann 29. nóvember. Á þeim dögum gefa netverslanir jafnan góðan afslátt af úrvali vara og geta neytendur gert góð kaup fyrir jólin.

Ósk Heiða Sveinsdóttir, forstöðumaður þjónustu og markaða hjá Póstinum, segir að stóru netverslunardagarnir, sum sé Makalausi dagurinn, Svartur Föstudagur og Stafrænn Mánudagur, séu að festa sig í sessi hjá Íslendingum.

Hún segir að sprenging hafi orðið í pakkasendingum innanlands undanfarin áratug  samhliða breyttri kauphegðun. Covid-19 hafi aukið netverslun enn frekar. Pósturinn leggi mikla vinnu í að bregðast við auknu álag á hátíðunum framundan.  

„Það er mikill hasar og fjör hjá okkur í kringum alla stóru netverslunardaga en Makalausi dagurinn var algjör sprengja hjá okkur í fyrra, enda fyrstu Covid-jólin og mjög margir að færa viðskipti sín yfir í netverslun fyrst þá. Við lærðum af reynslunni í fyrra og vorum vel undirbúin núna. Það var frábært að sjá hvað það var góður gangur í þessu hjá okkur og allt gekk vel.

Við vorum með starfsfólk að vinna úr pakkaflóðinu alla helgina og við erum svo sannarlega klár í vertíðina framundan. Við erum að fylla mjög ört á Pakkaport og Póstbox en þau síðarnefndu eru opin allan sólarhringinn alla daga vikunnar. Við hvetjum fólk til að sækja sendingarnar sínar fljótt svo hægt sé að koma sem flestum sendingum út og fleiri geti sótt sendingar sínar fljótt og örugglega. Þá eru góð samskipti við viðskiptavini algjört lykilatriði og virkilega gleðileg endurgjöf sem við erum að fá eftir þessa fyrstu stóru daga vertíðarinnar sem er okkur dýrmæt. Við munum halda áfram að gera okkar allra besta á komandi dögum og hlökkum mikið til,“ segir Ósk Heiða.