Mainframe Industries, norrænt leikjafyrirtæki stofnað í apríl 2019 til að þróa tölvuleiki til spilunar í skýinu, tilkynnti í dag að félagið hefur lokið 7.6 milljóna evra hlutafjárútboði sem jafngildir 1,1 milljarði króna.

Fjármögnun Mainframe var leidd af Andreessen Horowitz hjá a16z, sem er einn virtasti vísisjóður (VC) heims, ásamt þátttöku Riot Games, en Riot eru framleiðendur League of Legends, stærsta fjölnotendatölvuleiks í heimi. Fyrri fjárfestar Maki.vc, Play Ventures, Sisu Game Ventures, og Crowberry Capital tóku allir þátt í útboðinu.

Mainframe er finnskt-íslenskt leikjafyrirtæki, stofnað af fyrrum starfsmönnum CCP, Remedy og Next Games. Félagið er að þróa nýjan ónefndan fjölspilunarleik (MMO) sértaklega hannaðan til spilunar í skýinu, en leikurinn er þróaður á starfsstöðvum Mainframe í Helsinki og Reykjavík þar sem nú starfa 20 manns.

„Við trúum því að leikir hannaðir til spilunar í skýinu muni gjörbylta afþreyingariðnaðinum á komandi árum og muni leiða til bæði nýrra notendaupplifana og viðskiptatækifæra,” segir Andrew Chen, fjárfestingastjóri hjá a16z í fréttatilkynningu.

Spilun í skýinu leyfir aðgang að leik frá tækjum af ýmsum stærðum og gerðum, ýmist snjallsímum, PC tölvum og leikjatölvum. Í tilfelli fjölnotendaleiks verða bæði leikjavél og netþjónn í skýinu. Þetta gerir leikendum kleift að nálgast og streyma leik með sem allra minnstri fyrirhöfn líkt og Netflix og Spotify hafa áður rutt veginn fyrir myndefni og tónlist.

Efni leiksins hefur ekki enn verið afhjúpað en nú einbeitir Mainframe sér að því að safni liði til að taka þátt í þróun leiksins, bæði á starfstöðvum þess í Helsinki og Reykjavík.