Lilja Samúelsdóttir hefur verið ráðin fjármálastjóri Malbikstöðvarinnar og Fagverks. Síðastliðin fimmtán ár hefur hún starfað á fyrirtækjasviði Landsbankans.

Ráðning Lilju kemur til meðal annars vegna vaxtar fyrirtækjanna en þann vöxt má rekja til nýrrar og umhverfisvænnar malbikunarstöðvar á Esjumelum. Hún er með meistaragráðu í fjármálum fyrirtækja frá Háskólanum í Reykjavík. Þetta kemur fram í tilkynningu.

„Það er okkur orðið nauðsynlegt að fá manneskju eins og Lilju til starfa þar sem vöxturinn hefur verið mun hraðari og markaðshlutdeildin stærri en áætlanir gerðu ráð fyrir árið 2020. Við þurfum að setja frekari styrk í fjármálastjórnun og Lilja býr yfir þeirri reynslu og þekkingu sem til þarf,“ segir Vilhjálmur Þór Matthíasson, framkvæmdastjóri Malbikstöðvarinnar og Fagverks.

Malbikstöðin framleiðir umhverfisvænt hágæða malbik en Fagverk sérhæfir sig í malbikun og hafa fyrirtækin verið í rekstri í tæp 20 ár.

„Ég lít svo á að það sé nauðsynlegt að ögra sér í lífi og starfi og fagna því að fara núna aðeins út fyrir þægindarammann í allt annað umhverfi. Hjá fyrirtækjunum starfar frábær hópur fólks og ég hlakka til að takast á við þau verkefni sem starfsemin hefur upp á að bjóða,“ segir Lilja Samúelsdóttir, fjármálastjóri Malbikstöðvarinnar og Fagverks.